काठमाडौं – गायक प्रकाश सपुतको अभिनय रहने फिल्म ‘सोल्टिनी’को छायाङ्कन सुरु भएको छ । इलामको सानो पाथीभरा मन्दिरमा मंगलबार शुभ मुहूर्त गर्दा ‘सोल्टिनी’ टिम छायाङ्कनमा निस्किएको हो ।

निर्देशक अर्जुन सुवेदीका अनुुसार शुभ मुहूर्तमा गरिएकै मन्दिरमा प्रकाश, नायिकाहरु परीक्षा लिम्बू, सुब्बु गुरुङ र कलाकार सुन्दर धितालको महत्त्वपूर्ण अंश खिचिएको छ ।

३१ दिनको छायाङ्कन सक्ने योजनाका साथ निर्देशक सुबेदी छायाङ्कनमा निस्किएका हुन् । उनका अनुसार यो फिल्मको छायाङ्कन इलाम र भोजपुरका विभिन्न स्थानमा हुनेछ ।

यो फिल्ममा कलाकारहरुको बलियो आइनअप छ । फिल्ममा प्रकाश, परीक्षा, सुब्बु, सुन्दरसहित रवीन्द्र झा, प्रकाश घिमिरे, विल्सनविक्रम राई, कविता आलेलगायतका कलाकारहरुको अभिनय रहने बताइएको छ ।

निर्माण पक्षका अनुसार प्रकाश र परीक्षा फिल्ममा जोडीको भूमिकामा छन् । यी दुईको यो पहिलो सहकार्य हो ।

समाजमा व्याप्त अमानवीय व्यवहार र जातीय भेदभावविरुद्धको कथामा यस फिल्म बन्ने निर्देशक सुबेदीको दाबी छ ।

प्लानेट थ्री फिल्म्सको प्रस्तुति तथा नेपसिने र योलो इन्टरटेन्मेन्टको सहकार्यमा बन्न लागेको यो चलचित्रका निर्माताहरू रेजिना बिस्ट र संसार चौलागाईं हुन् ।

चलचित्रलाई २०८२ सालको असोज ३ गते संविधान दिवसको दिन प्रदर्शन हुने निर्माण पक्षले घोषणा गरेको छ ।