काठमाडौं– नेपाल प्रहरीले नक्कली इन्सपेक्टर बनेर ठगी कार्यमा संलग्न व्यक्तिलाई पक्राउ गरेको छ । नेपाल प्रहरीको प्रहरी निरीक्षकको पोशाकको दुरुपयोग गरी नक्कली प्रहरी परिचय पत्र बोकेर ठगी धन्दामा संलग्न सुदीप थापालाई कागेश्वरी मनोहरा नगरपालिका– ७ थापाचोकबाट पक्राउ गरेको हो । 

उनी विशेष बढुवा सिफारिस सूची प्रकाशित गरिएको पत्र, प्रहरी निरीक्षकको युनिफर्म लगाएको फोटोसमेत खिचेर विभिन्न उच्च पदस्थ व्यक्तिसँग सम्पर्क रहेको भन्दै ठगी धन्दामा संलग्न रहेको प्रहरीको दाबी छ ।

उनले प्रलोभनमा पारी वैदेशिक रोजगारका लागि क्यानडा, अस्ट्रेलियालगायतका देशमा पठाइदिन्छु भन्दै विभिन्न व्यक्तिलाई ठगी गरेको गोप्य सूचनाको आधारमा पक्राउ गरिएको उपत्यका अपराध अनुसन्धान कार्यालय टेकुले जनाएको छ । 

प्रहरीका अनुसार प्रहरी निरीक्षकको परिचय पत्र किर्ते गरी बनाउने कार्यमा संलग्न काठमाडौं महानगरपालिका–३२ कोटेश्वरस्थित मार्शल प्रिन्टिङ प्रेसका सञ्चालक किशोरकुमार चौधरीलाई पनि पक्राउ गरेको छ । 

पक्राउ परेका दुवै जनाविरुद्ध ठगी तथा लिखत सम्बन्धी कसूर (किर्ते) मुद्दामा थप अनुसन्धानको लागि जिल्ला प्रहरी परिसर भद्रकाली पठाइएका उपत्यका अपराध अनुसन्धान कार्यालयले जनाएको छ ।