जनकपुर– जनकपुरस्थित हँसपुर नगरपालिकाको केन्द्र सार्ने विषयमा भएको झडपमा घाइते भएक वृद्धको मृत्यु भएको छ ।

करिब एक महिना अघि (गत साउन २१) गते भएको झडपमा परी गम्भीर घाइते हँसपुर नगरपालिका २ का ५५ वर्षीय तपेश्वम मण्डलको जनकपुर अञ्चल अस्पतालमा उपचारको क्रममा बुधबार राति निधन भएको हो ।

नगरपालिकाको केन्द्र सार्न खोज्ने मेयर र सार्न नदिने उपमेयर समूहबीच साउन २१ गते झडप भएको थियो ।

बघचौरामा रहेको हँसपुर नगरपालिकाको केन्द्र मेयर रामज्ञान मण्डलले आफ्नो घर पायकको क्षेत्र बेल्हीमा सार्ने प्रयास गरेका थिए । उनले बेल्हीमा कार्यालयसमेत उद्घाटन गरेका थिए ।

साउन २१ गते बघचौरामा रहेको नगरपालिकाको कार्यालयबाट सामानहरु सारेर बघचौरा सार्न सोजिएपछि झडप भएको थियो । झडपमा उपमेयर रेणु झासहित केही घाइते भएका थिए ।

झडप भएपछि जिल्ला समन्वयमा बसेको बैठकले घाइतेको उपचार नगराउने लगायतको सहमति भएको थियो तर मेयरले उपचारमा चासो नदेखाउँदा मण्डलको मृत्यु भएको आरोप नेकपाको स्थानीय नेतृत्वले लगाएको छ ।

मण्डलको मृत्यु भएपछि आक्रोशित स्थानीयले अस्पताल अगाडि प्रदर्शन गरेका छन् । उनीहरुले मेयरका कारण मण्डलको मृत्यु भएको भन्दै उनीमाथि कारवाही हुनुपर्ने बताएका छन् ।