काठमाडौं – भारतमा स्मार्टफोन निर्माण गर्नका लागि चिनियाँ प्राविधिक उपकरण कम्पनी भिभो र भारतीय कम्पनी डिक्सन टेक्नोलोजीले सहकार्य गर्ने भएका छन् । भारतमा स्मार्टफोन उत्पादन गर्नका लागि दुई कम्पनीले संयुक्त रुपमा व्यवसाय थाल्न आँटेका हुन् ।

संयुक्त व्यवसायमा डिक्सन टेक्नोलोजीको बहुमत स्वामित्व रहने जनाइएको छ । भारतीय आर्थिक अनलाइन पोर्टल इकोनोमिक टाइम्सका अनुसार नयाँ व्यवसायमा डिक्सनको स्वामित्व ५१ प्रतिशत रहनेछ भने भिभोको स्वामित्व ४९ प्रतिशत रहनेछ ।

हाल भारत सरकारले भारतमा उपकरण उत्पादन गर्न चाहने चिनियाँ कम्पनीलाई भारतीय कम्पनीसँग सहकार्य गर्न प्रोत्साहन गर्ने नीति लिएको छ । सोही नीतिअनुसार दुई कम्पनीबीच सहकार्य भएको इकोनोमिक टाइम्सले उल्लेख गरेको छ ।

डिक्सनले सामसुङ, सिओमी, मोटोरोला, ओप्पो, गुगल, नथिङजस्ता कम्पनीका लागि पनि स्मार्टफोन उत्पादन गर्दै आएको छ । भिभोले भारतीय बजारमा विगत १० वर्षदेखि सेवा दिँदै आएको छ । यस कम्पनीले हालै ग्रेटर नोयडा क्षेत्रमा ३ हजार करोड भारतीय रुपैयाँ लगानीमा १ सय ७० एकड क्षेत्रफलमा कारखाना स्थापना गरेको छ ।