काठमाडौं- नायक सलोन बस्नेतले निर्माण गरेको फिल्म ‘रंगी’को जापान प्रदर्शन अधिकार बिक्री भएको छ । निर्माण पक्षले मंगलबार युना इन्टरटेनमेन्टलाई प्रदर्शन अधिकार बेचेको जानकारी दिएको हो ।

निर्माण पक्षले प्रदर्शन अधिकार कतिमा बेचको हो भन्ने खुलाएको छैन । तर, युना इन्टरटेनमेन्टका उज्जवल गुरागाईंसँग कागजी सम्झौता भइसकेको बताइएको छ ।

सलोन बस्नेत प्रस्तोता रहेको यो फिल्म फागुन २ बाट प्रदर्शनमा ल्याउने बताइएको छ । फिल्ममा सलोनसहित नम्रता श्रेष्ठ, दिलीप रायमाझी, आयुषी ढकाल, उत्तम केसी, सुमिन गुरुङ, र विशाल पहारीको अभिनय छ ।

सलोनका अनुसार यो फिल्मले बुवा-छोरीको सम्बन्धको कथा उठान गरेको छ ।

यही फिल्मबाट सुरेश न्यौपानेले निर्देशनमा डेब्यू गर्दै छन् । उनीसँग ‘छक्का पन्जा’, ‘ए मेरो हजुर २’, ‘यात्रा’, ‘म यस्तो गीत गाउँछु २’ र ‘कृ’लगायतका फिल्ममा मुख्य सहायक निर्देशन गरेको अनुभव छ ।

सलोनको होम ब्यानर सान्भी इन्टरटेनमेन्ट प्रालिकोमा बनेको यही फिल्मबाट उनले निर्माणमा डेब्यू गरेका हुन् । यस फिल्मको कथा सुमन गजमेरले लेखेका हुन् । लगानी भने सक्षम सुवीदीको छ ।