गुवाहाटी– भारतको आसाममा विषाक्त मदिरा (देसी दारु)को सेवनबाट कम्तीमा १७ जनाको ज्यान गएको छ । राजधानी गुवाहाटीबाट ३ सय १० किलोमिटर टाढा गोलाघाटमा भन्ने स्थानमा रहेको चिया बगानमा काम गर्ने मजदुरले विषाक्त मदिराको सेवन गर्दा भएको घटनामा अरु ४० जना भन्दा धेरै सिकिस्त बिरामी परेका छन् ।

साप्ताहिक पारिश्रमिक आएपछि स्थानीय चिया बगानका १ सय जनाभन्दा धेरै कामदारले मदिरा सेवन गरेका थिए । मारिनेमा ७ जना महिलासमेत रहेका जनाइएको छ । मदिरा सेवनपछि बिमारी परेकाहरुलाई अस्पतालमा भर्ना गर्ने क्रम जारी रहेको स्थानीय अधिकारीले जनाएका छन् ।

सिकिस्त बिमारी परेकामध्ये केहीको अवस्था नाजुक रहेकाले मृतकको सङ्ख्या बढ्नसक्ने अनुमान गरिएको छ ।

दुई साताअघि मात्रै भारतको उत्तराखण्डमा विषाक्त मदिरा सेवनपछि १ सय जनाभन्दा धेरैको ज्यान गएको थियो ।

‘देसी शराब’ वा ‘देसी दारु’ भनेर चिनिने निम्नस्तरका मदिराको सेवनबाट भारतमा वर्षेनी कयौँको ज्यान जाने गर्छ ।