बगदाद– इराकको निनेभा प्रान्तमा इराकी सुरक्षा फौजले गरेको गरेको कारवाहीमा आतंककारी संगठन इस्लामिक स्टेटका नौ लडाकु मारिएका छन् । अमेरिका नेतृत्वको अन्तर्राष्ट्रिय गठबन्धन सेनाको सहयोगमा इराकी फौजले गरेको कारवाहीमा अरु धेरै लडाकु घाइते भएको इराकी सेनाले जनाएको छ ।

कारबाहीको क्रममा मोसुल शहरबाट दक्षिण पश्चिममा पर्ने सहजी इलाकामा एक सुरुङ ध्वस्त पारिएको र अरु नौजना आइएस लडाकू मारिएका इराकी सेनाले जनाएको हो ।

सन् २०१७ को अन्त्यमा इराकी सुरक्षा बलले इस्लामिक स्टेटलाई हराएपछि इराकको सुरक्षास्थितिमा तुलनात्मक रुपमा सुधार आएको छ ।

यद्यपि इस्लामिक स्टेटका लडाकुले ग्रामीण क्षेत्रहरूमा आफ्नो सुरक्षित आश्रयस्थल बनाएर इराकी फौजमाथि बेलाबेला छापामार आक्रमण गर्दै आएका छन् ।