काठमाडौं- फिल्म ‘होस्टेल’को तेस्रो श्रृङ्खला ‘होस्टेल–३’को छायाङ्कन पूरा भएको छ । ४९ दिनमा गत शुक्रबार फिल्मको सम्पूर्ण छायाङ्कन पूरा भएको निर्देशक सशान कँडेलले जानकारी दिए ।

यस फिल्मको प्रदर्शन पूर्वनिर्धारित मितिमा भने नहुने भएको छ । यस फिल्मको प्रदर्शन मिति फागुन १६ लाई तोकिएको थियो ।

उक्त मितिमा अन्य फिल्म पनि प्रदर्शनमा आउन भएकाले निर्माण पक्षले अर्को उपयुक्त समयको खोज्दै गरेको बुझिएको छ ।

कँडेलका अनुसार अहिले फिल्मको पोस्ट–प्रोडक्सनको काम जारी छ । अबको केही दिनै नयाँ प्रदर्शन मिति घोषणा गर्ने तयारीमा उनी छन् ।

यस फिल्ममा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी मुख्य भूमिकामा रहेको बताइएको छ ।

फिल्मको कथा कँडेलको हो भने स्क्रिप्ट माधव शर्माले लेखेका हुन् । म्मान इन्टरटेन्मेन्टले आरोन कन फिल्म्ससँगको सहकार्यमा निर्माण हुने यस फिल्मको निर्माता कर्ण कार्की र गोविन्द अधिकारी हुन् ।

होस्टेलका विगतका श्रृङ्खलाबाट नेपाली फिल्मले नयाँ स्टार पाउँदै आएको छ । यस पटक पनि नयाँ स्टारको उदय हुने फिल्म क्षेत्रमा चर्चा छ ।

नायक अनमोल केसी, स्वस्तिमा खड्का, सुशील श्रेष्ठ, नाजिर हुसेन, सलोन बस्नेत, प्रकृति श्रेष्ठ होस्टल श्रृङ्खलाबाटै फिल्ममा स्थापित भएका हुन् ।