काठमाडौं – इङ्लिस प्रिमियरसिपको शनिबार भएको खेलमा आर्सनलले क्रिस्टल प्यालेसलाई ५-१ ले हराएको छ।

गाब्रियल जिससले आर्सनलका लागि-२ गोल गरे भने काइ हार्भाटेज, गाब्रियल मार्टीनेली र डेकलन राइसले थप गोल गरे। एक साताकै बिचमा जिसस क्रिस्टलका विरुद्धमा जिसस पाँचौँ गोल गर्न सफल भएका छन्।

बुधबार भएको कारबाओ कपको क्वार्टरफाइनलमा पनि उनले ह्याट्रिक गरेका थिए। पहिलो हाफमा आर्सनलका लागि जिससले दुवै गोल गरेका थिए भने प्यालेसका लागि इस्माइला सारले गोल गरे।

छैटौँ मिनेटमा जिससको गोलमा अग्रता लिएको आर्सनलको विरुद्धमा ११ औँ मिनेटमा सारले गोल गरे। १४ औँ मिनेटमा जिससले अर्को गोल गरे।

विजयी आर्सनल १७ खेलमा ३३ अङ्कसहित तेस्रो स्थानमा छ। शीर्ष स्थानमा रहेको लिभरपुलको १५ खेलमा ३६ अङ्क छ।

दोस्रो स्थानमा रहेको चेल्सीको १६ खेलमा ३४ अङ्क छ। नटिङघम फरेस्टको १७ खेलमा ३१ तथा अस्टन भिल्लाको १७ खेलमा २८ अङ्क छ।