काठमाडौं – दक्षिणपूर्वी एशियाली मुलुकमा चिनियाँ गिरोहले संदिग्ध रुपमा ठूलो स्तरमा साइबर आक्रमण गर्दै आएको खुलासा भएको छ । सिमान्टेक थ्रेट हन्टर ग्रुप नामक समूहले सार्वजनिक गरेको प्रतिवेदनअनुसार चीनमा आधारित रहेका साइबर गिरोहले दक्षिणपूर्वी एशियाली मुलुकमा रहेका प्रतिष्ठित संस्थालाई लक्षित गरी साइबर आक्रमण गर्दै आएका छन् ।

उक्त प्रतिवेदनका अनुसार यस्ता समूहले मुख्यगरी सरकारी संस्थालाई लक्षित गरी साइबर आक्रमण गर्दै आएका छन् । त्यसबाहेक संवेदनशील पूर्वाधार र टेलिकम, रक्षा ऊर्जाजस्ता महत्वपूर्ण औद्योगिक क्षेत्र पनि गिरोहको निशानामा पर्ने गरेका छन् ।

खासगरी सूचना चोरी गर्ने नियतले यस्ता साइबर आक्रमण हुने गरेको सिमान्टेकले जनाएको छ । यस्ता महत्वपूर्ण क्षेत्रका सूचना रणनीतिक रुपमा निकै संवेदनशील हुने भएकाले पनि साइबर आक्रमणको निशानामा पर्ने गरेको जनाइएको छ ।

‘अर्थ बाकु’ नाम गरेको साइबर अपराधिक गिरोहले यसअघि हिन्द प्रशान्त क्षेत्रमा मात्रै आफ्ना आक्रमणलाई केन्द्रित गर्दै आएकोमा हाल भने त्यसले युरोप, मध्यपूर्व र अफ्रिकामा पनि आफ्नो गतिविधि विस्तार गरेको प्रतिवेदनमा उल्लेख छ ।

सिमान्टेकका अनुसार यस गिरोहले रक्सासा नामक प्राविधिक उपकरणको प्रयोग गरी आफ्ना आपराधिक गतिविधि गर्दै आएको छ । यो उपकरणमा चिनियाँ प्रविधि भएको जनाइएको छ ।