काठमाडौं- कलकार तथा निर्देशक दीपकराज गिरीले सहकारी ठगी प्रकरणमा कात्तिक ३ गतेदेखि कास्की प्रहरीको हिरासतमा रहेका राष्ट्रिय स्वतन्त्र पार्टी(रास्वपा)का सभापति रवि लामिछानेलाई चाँडै बाहिर देख्न चाहेको बताएका छन् ।

गत २४ कात्तिकमा कास्की प्रहरीको हिरासतमै पुगेर रविलाई भेटेका उनले शुक्रबार सामाजिक सञ्जालमा लेख्दै रविलाई चाँडै बाहिर देख्ने चहाना पनि व्यक्त गरेका छन् ।

‘म थुनामा भेट्न गएँ उहाँलाई । प्रहरीले क्यामरा ढोकामै लियो, त्यसैले भित्रको फोटो खिच्न पाउने कुरै भएन’, उनले भने, ‘मलाई सत्तामा भएका मान्छेसँग खासै भेट्न मन लाग्दैन । त्यसैले उहाँ मन्त्री हुन्जेल भेटघाट भएन मेरो । तर थुनामा चाहिँ भेट्न जान मन लाग्यो र भेटेँ।’

साथीलाई सुखमा नभएर दुःखमा भेट्नुपर्छ भन्ने मान्यताअनरुप आफू भेट्न गएको गिरीले बताएका छन् । ‘उहाँसँगको भेटमा आत्मविश्वासी हुनु हुन्थ्यो । डर, त्रास वा हीनताबोध केही थिएन,’ उनले भनेका छन् ।

• हिरासतमा रवि भेटेपछि दीपकराज भन्छन्- उनले त्यति ठूलो बदमासी गरे जस्तो लाग्दैन

रवि दोषी वा निर्दोष आफूले भन्न नसक्ने पनि उनले बताएका छन् । ‘तपाईं दोषी हो वा निर्दोषी, त्यो त मैले भन्ने कुरा होइन । तर, धेरै मानिसको विश्वास छ तपाईं निर्दोष हुनुहुन्छ’, उनले भनेका छन् ।

यदि निर्दोष भए रविलाई चाँडै ‘बाहिर भेट्न पाइयोस्’ भन्ने कामना पनि गिरीले गरेका छन् । ‘चुप लाग’ भन्छन् साथीहरू बोल्ने बानी छ के गर्ने ?’ गिरीले भनेका छन् ।

गिरी सामाजिक सञ्जालमा लेखेर चर्चामा आइरहन्छन् । उनी विवादमा पनि पररिरहन्छन् । दीपकले रविलाई आफ्ना बालखसा भन्दै आएका छन् । दीपकले आफ्ना सामाजिक गतिविधिमा रवि र रास्वपालाई समर्थन र सदासयता देखाइरहन्छन् ।