काठमाडौं- राष्ट्रिय स्वतन्त्र पार्टीका सभापति रवि लामिछाने हिरासतमा सुतिरहेको दाबीसहित सीसीटीभी क्यामेरा फोटो बाहिरिएपछि अर्को तरंग भएको छ।

यो फोटोलाई लिएर विभिन्न प्रश्न उठिरहेका छन् । यो फोटो फेक हो या वास्तविक भन्नेमा बहस जारी छ ।

यही फोटोलाई लिएर जिल्ला प्रहरी कार्यालय कास्कीले अनुसन्धान भइरहेको जनाएको छ।

‘हामीले फोटोबारे अनुसन्धान गरिरहेका छौँ, फेक या वास्तविक के हो, छानबिनपछि यसबारे निर्णय हुन्छ’, कास्की प्रहरी सूचना अधिकारीप्रहरी नायव उपरीक्षक वसन्तकुमार शर्माले खबरहबसँग भने, ‘फोटो मैले खिचेको हो भनेर एकजना व्यक्तिले सामाजिक सञ्जालमा हाल्नुभएको छ। उहाँबारे पनि प्रहरीले अनुसन्धान गरिरहेको छ।’

यसैबीच फोटो मैले खिचेको भन्दै एकजना विवादित पात्र डाक्टर निकोलश भुसालले सामाजिक सञ्जालमा लेखेका छन् । उनले फेसबुक लाइभमा आएर आफूले हिरासतको सीसीटीभी फुटेजबाट फोटो बाहिर ल्याएर गल्ती गरेको भन्दै माफीसमेत मागेका छन् ।

‘जिल्ला प्रहरी कार्यालय कास्कीमा जाँदा रवि लामिछाने हिरासतमा बसेको सीसी क्यामेराको फोटो मैले खिचेको हो । मैले सामाजिक सञ्जालमा पाएर पोस्ट गरेको थिएँ’, उनले भनेका छन्, ‘फोटो त्यही सीसीटीभीबाट खिचेको हो मैले ।’

उता रविका सहयोगीसमेत रहेका रास्वपा नेता दीपक बोहोराले यो पोटो रविकै भएको जिकिर गरेका छन् ।

‘यो फोटो आएपछि आज प्रहरीले कडाइ गरेको छ । त्यो फोटो कसरी आयो ? छानबिन हुनुपर्छ । तर प्रहरीले कडाइ गरेको छ, चेकजाँच गरेको छ’, उनले कास्की प्रहरी कार्यालय अगाडिबाट लाइभ आएर भनेका छन्, ‘प्रहरीले यसबारेमा छानबिन सुरु गरेको भनेको छ ।’