काठमाडौं– चालु आर्थिक वर्षको पहिलो पाँच महिनामा झण्डै २२ अर्बको विदेशी लगानी प्रतिबद्धता थप भएको छ ।

उद्योग विभागद्वारा सार्वजनिक तथ्यांकअनुसार चालु आर्थिक वर्षको मंसिर महिनासम्ममा ३१९ वटा विभिन्न उद्योगहरूमा २० अर्ब ७७ करोड ७३ लाख ६३ हजार ४ सय रुपैयाँ बराबरको विदेशी लगानी प्रतिबद्धता आएको हो ।

विभागकाअनुसार चालु आर्थिक वर्षमा आएको कुल लगानी प्रतिबद्धतामध्ये १३८ वटा विभिन्न उद्योगले अटोमेटिक प्रणालीबाट लगानीको स्वीकृति लिएका छन् भने १८१ वटा विभिन्न उद्योगले नियमित प्रकृयाबाट लगानी स्वीकृति लिएका छन् । तथ्यांकअनुसार चालु आर्थिक वर्षको मंसिर मसान्तसम्म आएको लगानी प्रतिबद्धताको सबैभन्दा ठूलो हिस्सा पर्यटन क्षेत्रको लागि आएको छ ।

१४५ वटा उद्योग पर्यटन क्षेत्रमा, १०६ वटा उद्योग सूचना तथा प्रविधि क्षेत्रमा, ४० वटा उद्योग सेवा क्षेत्रमा, २२ वटा उद्योग उत्पादन क्षेत्र र ५ वटा उद्योगले कृषि क्षेत्रको लागि लगानी प्रतिबद्धता जनाएका छन् ।

 सङ्ख्यात्मक रूपमा जस्तै लगानी प्रतिबद्धताको हिसाबले पनि पर्यटन क्षेत्रमा नै सबैभन्दा धेरै ६२ प्रतिशत अर्थात् १२ अर्ब ७६ करोड ६५ लाख ५९ हजार रुपैयाँ बराबरको आएको छ । त्यस्तै, सेवा क्षेत्रमा दोस्रो धेरै ४ अर्ब ८३ करोड बराबरको लगानी प्रतिबद्धता आएको तथ्यांकले देखाएको छ ।

विभागकाअनुसार नेपालमा सुरुवातदेखि हालसम्म ५ खर्ब ४० अर्ब ५३ करोड ९८ लाख ६० हजार ७०५ रुपैयाँ बराबरको लगानी प्रतिबद्धता आएको छ भने ३ लाख ३७ हजार ५१४ जनालाई रोजगारी दिने ती कम्पनीले उल्लेख गरेका छन् ।