काठमाडौं- नेकपा (एकीकृत समाजवादी)का सम्मानित नेता झलनाथ खनालले अहिले पार्टीभित्र तलका कमिटीहरूमा नबस्ने, माथिल्लो कमिटीमा मात्रै ओगट्ने र आफूले भनेको पद नपाए पार्टी छोडिदिने प्रवृत्ति बढेको बताएका छन् ।

आइतबार जारी स्थायी कमिटी बैठकमा सम्मानित नेता खनालले पेश गरेको प्रतिवेदनमा पार्टीभित्र गलत प्रवृत्ति देखा परिरहेको बताएका हुन् ।

अध्यक्ष माधवकुमार नेपालतिर लक्षित गर्दै उनले पदमा पुगेपछि दुरुपयोग गर्ने, कमिशन र भ्रष्टाचारतिर लाग्ने, पद पाएपछि त्यसैमा टाँसिइरहने समस्या देखिएको पनि उनले बताए ।

‘काम गर्ने क्षमता गुमे पनि, बुढो भइसके पनि पदमा टाँसिइरहने प्रवृत्ति पार्टीमा देखिएको छ’, उनले भने । केही महिनाअघि भएको १०औँ महाधिवेशनबाट अध्यक्ष हुन चाहेका खनाललाई नेपालले रोकेका थिए। नेपाल नै अध्यक्ष भएपछि सम्मानित नेतामा दोहोरिएका खनाल अहिले पनि असन्तुष्ट छन् ।

पार्टी नेताहरूले पदको गरिमाअनुसार काम गर्न नसकेको, पार्टीलाई सहयोग नगरेको तर पार्टीले सहयोग गरोस् भन्ने चाहना पालेको टिप्पणी पनि खनाले गरे ।

‘कार्यकर्ताका कुरा नसुन्ने, आफूलाई जे लाग्छ त्यहीअनुरुप गर्न खोज्ने, पदका निम्ति कमिटीलाई बलिदान गर्न पनि तयार हुने समस्या देखियो’, उनले भने, ‘पार्टी र कमिटीलाई निजी हित र स्वार्थमा प्रयोग गर्ने, नेताहरूबीच चाप्लुसी र चुक्ली लगाउने, नीतिकोभन्दा नेताको पछि लाग्ने, अरुका विचार नसुन्ने, आफ्ना विचार अरु माथि लाद्न खोज्ने गलत कार्यशैली समाजवादीमा देखिएका छन् ।’