काठमाडौं– एक वर्षको अवधिमा नेपाल स्टक एक्सचेन्ज (नेप्से) ८९६ अंकले वृद्धि भएको छ ।

२०८० कात्तिक मसान्तमा १८५२.०९ अंक रहेको नेप्से पछिल्लो १ वर्षमा वृद्धि भएर गएको कात्तिक मसान्तसम्म २७४८.७९ अंकमा पुगेको थियो । यद्यपि पछिल्लो दिनका कारोबारमा केही गिरावट आएर आज बिहीबारको कारोबार सम्म आइपुग्दा नेप्से २६८२.२९ अंकमा सीमित भएको छ ।

नेप्से सुचकांकमा भएको वृद्धि भएसँगै एक वर्षका अवधिमा नेप्सेको शेयर पुँजीकरणमा पनि ठूलो मात्रामा वृद्धि भएको छ । अघिल्लो वर्षको कात्तिक मसान्तमा २८५३ अर्ब १ करोड रहेको नेप्सेको शेयर पुँजीकरण चालु आर्थिक वर्षको कात्तिक मसान्तसम्म आइपुग्दा ४३७६ अर्ब ९० करोड पुगेको हो ।

एक वर्षको अवधिमा नेप्सेको शेयर पुँजीकरणमा १५ खर्ब २३ अर्ब ८ करोडले वृद्धि भएको देखिएको छ । यद्यपि आज बिहीबारसम्म भने नेप्सेको शेयर पुँजीकरण ४४ खर्ब ४९ अर्ब ११ करोड रहेको छ ।

समीक्षा अवधिमा नेप्सेमा सूचीकृत कम्पनीहरूको सङ्ख्या ३ वटा थपिएको छ । ०८० कात्तिक मसान्तसम्म नेप्सेमा सूचीकृत कम्पनीको सङ्ख्या २६४ वटा रहेकोमा चालु आर्थिक वर्षको कात्तिक मसान्तसम्म यस्तो सङ्ख्या २६७ वटा पुगेको हो ।

चालु आर्थिक वर्षको पहिलो चार महिनामा ३ अर्ब ९१ करोड बराबरको हकप्रद शेयर, ३ अर्ब ६७ करोड बराबरको बोनस शेयर, ४७ लाख बराबरको एफपीओ गरी ७ अर्ब ५८ करोड बराबरको थप धितोपत्र सूचीकृत भएको छ ।

समीक्षा अवधिमा नेपाल धितो पत्र बोर्डले ५ अर्ब ८९ करोड बराबरको हकप्रद शेयर, १ अर्ब ९० करोड बराबरको म्युचुअल फन्ड सार्वजनिक निष्कासनका लागि अनुमति दिएको थियो ।