काठमाडौं– नेपाल भेटेरीनरी एशोसिएशनले गाई हत्यामा संलग्न रहेको दावी गर्दै नेपालगञ्ज उपमहानगरपालिकाका मेयर डा. धवलशमशेर राणालाई तत्काल कारवाही गर्न माग गरेको छ ।

एशोसिएशनका अध्यक्ष डा. सितलकाजी श्रेष्ठले पशु हत्या गर्नेमाथि तीन वर्षसम्म कैद सजाय समेतको व्यवस्था कानूनमै उल्लेख गरिएको भन्दै गाई हत्यामा संलग्न मेयर राणालाई कडा कारवाही गर्न माग गरे ।

सोमबार काठमाडौंमा पत्रकार सम्मेलन गरी उनले सुर्खेतमा गरिएको गाई हत्यामा संलग्न अन्यको पनि पहिचान गरी कडा कारवाही गर्न सरकारलाई सचेत गराए ।

अध्यक्ष श्रेष्ठले उक्त घटनामा संलग्नमाथि तत्काल कारवाही नगरे सरकारविरुद्ध नै आन्दोलन गर्न बाध्य हुने चेतावनी पनि दिए । त्यसैगरी एशोसिएशनले खोटाङको दिक्तेल बजारमा कुकुरको हत्या गरिएको भन्दै उक्त हत्यामा संलग्नमाथि पनि तत्काल कारवाही गर्न सरकारसँग माग गरेको छ ।

नेपाल विश्व पशु स्वास्थ्य संगठनको सदस्य राष्ट्र भएकाले कुनै पनि पशुमाथि कुटपिट गर्न समेत नपाउने एशोसिएशनको तर्क छ ।