काठमाडौं– पर्यटक आगमनको हिसाबले नेपालको पर्यटन क्षेत्रमा सुधार हुँदै गएको देखिएको छ । सन् २०२३ को ११ महिनाको तुलनामा सन् २०२४ को ११ महिनामा झण्डै डेढ लाख बढी पर्यटक नेपाल भित्रिएको पर्यटन बोर्डले जनाएको हो ।

बोर्डकाअनुसार सन् २०२४ को जनवरीदेखि नोभेम्बरसम्म १० लाख ५५ हजार ५०३ जना पर्यटक नेपाल घुम्न आए । सन् २०२३ को ११ महिनामा भने नेपाल घुम्न आउने पर्यटकको संख्या ९ लाख १८ हजार ३०८ जना मात्रै थियो । तथ्यांकअनुसार अघिल्लो अंग्रेजी वर्षको ११ महिनाको तुलनामा चालु अंग्रजी वर्षको ११ महिनामा नेपाल घुम्न आउने पर्यटकको संख्या १ लाख ३७ हजार २२५ ले बढी रहेको छ ।

सन् २०१९ को ११ महिनामा नेपालमा १० लाख ९६ हजार ३२५ जना पर्यटक घुम्न आएका थिए । सो संख्यालाई शतप्रतिशत मान्दा चालु अंग्रजी वर्षमा आउने पर्यटकको संख्यामा ९६ प्रतिशतले सुधार भएको देखिएको छ ।

चालु अंग्रेजी वर्षको नोभेम्बर महिनामा नेपालमा सबैभन्दा धेरै भारतबाट १९ हजार ९१५ जना, अमेरिकाबाट १० हजार ९८१, चीनबाट ९ हजार ४५८ र बेलायतबाट ६ हजार ६११ जना पर्यटक घुम्न आएका थिए ।