मलेसियाका मानव संशाधन मन्त्री एम कुलासेगरनले मलेसियाका ठूला रोजगारदाता कम्पनीले विदेशी कामदारको कोटा नघटाउने बताएका छन् । पछिल्लो समय मलेसियाका रोजगारदाता कम्पनीले सन् २०१९ भित्र ३० हजार नागरिकले रोजगारी गुमाउने अवस्था सिर्जना हुने चेतावनी दिइरहेको बेला मन्त्री कुलासेगरनले मलेसियाले रोजगारीका अवसर घटाउने भन्दा अझै धेरै सिर्जना गर्ने बताएका छन् ।

मलेसियन रोजगारदाता महासंघले सन् २०१९ भित्र रोजगारीलाई व्यवस्थीत नगरे मलेसियामा ३० हजार रोजगार कटौती हुने चेतावनी दिएको थियो ।

महासंघले मलेसियामा सन् २०१८ मा २४ हजार मलेसियन नागरिक बेरोजगार रहेको जनाएको थियो । ती नागरिकलाई विदेशी श्रमिकको कोटा काटौती गरेर रोजगार दिनुपर्ने सुझाव महासंघले सरकारलाई दिएको थियो ।

यसको खण्डन गदै कुलासेगरनले भने,‘यो वर्ष थप रोजगारीका अवसर सरकारले सिर्जना गरेको छ । बेरोजगारी दर चिन्ताजनक छैन यसमा आत्तिनुपर्ने अवस्था छैन ।’

मलेसियामा न्यून पारिश्रमिक आकर्षक नहुँदा मलेसियन नागरिक रोजगारीको खोजीमा तेस्रो देश जाने गरेका छन् । आफ्ना नागरिकलाई स्वदेशमा नै टिकाउन मलेसियाले गतबर्षदेखि प्रयास सुरु गरेको छ ।