पेरु– घासे पुल भन्दा जो कोहीलाई अचम्म लाग्न सक्छ । तर पेरुमा घाँसको डोरीबाट बनाइएको ६ सय वर्ष पुरानो घासे पुलु अझै अस्तित्वमा छ । पेरुको कुस्को इलाकामा रहेको अपुरिमेक नदीमा रहेको सो घाँसे पुललाई त्यहाँका स्थानीयले वर्षेनी मर्मत गर्ने गरेका छन् ।

हरेक वर्ष त्यो पुलमा बनाइएका घाँसे डोरीहरु फेर्छन् उनीहरु । पुरानो घाँसेपुल हटाएर मानिसहरुले हरेक वर्ष नयाँ घासेपुल बनाउँछन् । यो पुललाई इन्का रोप ब्रिज भनिन्छ ।

यो पुल इन्का साम्राज्यका बेला बनेको बताइन्छ । हातले बाटेका घाँसको मोटो डोरी नदीको वारपार बाँधेर पुल बनाइएको छ । पछिल्लो ६ सय वर्षदेखि स्थानीय मानिसहरुको खोला वारपार गर्ने माध्यम यही पुल हो ।

यो ऐतिहासिक पुललाई सन् २०१३ मा युनेस्कोले विश्व सम्पदा सूचीमा राखेको हो । हरेक वर्ष पुलको डोरी फेर्ने क्रममा नदीको वारि र पारि दुवैतर्फका बासिन्दाहरु जुट्दछन् र घाँसका मोटा मोटा डोरी बाट्दछन् ।