काठमाडौं–  स्वास्थ्य उपचारका लागि सिंगापुरमा रहेका प्रधानमन्त्री केपी शर्मा ओलीको स्वास्थ्य अवस्था सामान्य बन्दै गएको छ ।

शरीरमा क्रियाटिनिनको मात्रा बढेपछि उपचारका लागि भदौ पाँच गते सिंगापुर गएका प्रधामन्त्री ओलीको स्वास्थ्य अवस्था सामान्य रहेको प्रधानमन्त्रीका प्रेस सल्लाहकार कुन्दन अर्यालले जानकारी दिएका छन् ।

प्रधानमन्त्री ओलीको शरीरमा एन्टिबडीको मात्रा बढ्दै गएपछि भदौ ५ गते उनी सिंगापुर प्रस्थान गरेका थिए । प्रधानमन्त्री ओलीको शरीरमा भएको एन्टिबडीलाई निस्काशन गर्न ७ पटक प्लाज्मा फेरेसिसस गर्नुपर्ने उनका निजी चिकित्सकहरुले बताएका थिए ।

प्रधानमन्त्री ओलीको शरीरमा बढेको एन्टिबडी निराकरणका लागि हालसम्म ५ पटक प्लाज्मा फेरेसिस भइसकेको छ । अब सोमबार छैटौं पटक र बुधबार सातौं पटक प्लाज्मा फेरेसिस गरिने जनाइएको छ ।

बुधबार सातौं पटक प्लाज्मा फेरेसिस गरेपछि प्रधानमन्त्री ओली स्वदेश फर्किर्ने उनकी निजी चिकित्सक दिव्यसिंह शाहले बताइन् ।

‘प्रधानमन्त्री ओलीको शरीरमा भएको एन्टिबडी घटाउन प्लाज्मा फेरेसिस गरिएको थियो, अहिलेसम्म ५ पटक भइसकेको छ, ७ पटकसम्म गर्नुपर्ने हो,’ शाहले खबरहबसँग भनिन्, ‘ बुधबार ७ औं पटक प्लाज्मा फेरेसिस हुने मिति तय भएको छ । प्लाज्मा फेरेसिस सकिएपछि दुई -तीन दिनपछि नेपाल फर्किनुहुन्छ ।’

यसअघि प्रधानमन्त्री ओलीसँगै उनकी निजी चिकित्सक दिव्यसिंह शाह सिंगापुर गएकी थिइन् । उनी केही दिनअघि नेपाल फर्किएकी हुन् । अहिले प्रधानमन्त्री ओलीसँग अर्का निजी चिकित्सक डाक्टर दिलिप शर्मा सिंगापुरमा छन् ।

यसअघि प्रधानमन्त्री ओली गत साउन १८ गते सिङ्गापुरको सोही अस्पतालमा उपचार गराइ सुधार भएपछि साउन २७ गते स्वदेश फर्किएका थिए ।