काठमाडौं – पाकिस्तानको बलोचिस्तान प्रान्तमा सुरक्षाकर्मीसँगको मुठभेढमा ४ जनाको ज्यान गएको छ । बलोचिस्तान प्रान्तको मुसा खेल क्षेत्रमा पाकिस्तानको प्रतिआतंकवाद विभागका सुरक्षाकर्मीसँगको मुठभेढमा उनीहरुको मृत्यु भएको हो ।

यसरी मारिनेमा मुहम्मद नवाज बुजदर, गुलाम बुजदर र जफार मारी रहेका छन् । चौथो व्यक्तिको पहिचान भने खुल्न बाँकी रहेको जनाइएको छ । उनीहरुलाई केही समयअघि सुरक्षा बलले नियन्त्रणमा लिएर बेपत्ता पारेको बलोचिस्तान पोस्टले जनाएको छ ।

मुहम्मद नवाज बुजदरलाई गत सेप्टेम्बर १० मा लोरालाई क्षेत्रबाट सुरक्षाकर्मीले नियन्त्रणमा लिएका थिए भने जफार मारी र गुलाम बुजदरलाई राराशाम क्षेत्रबाट गत अक्टोबर २ मा नियन्त्रणमा लिइएको थियो । बन्धक बनाएका व्यक्तिलाई सुरक्षाकर्मीले हत्या गरेर मुठभेढको नाटक रचेको मानव अधिकारवादी संस्थाहरुले आरोप लगाएका छन् ।