काठमाडौं– सगरमाथा साहित्य प्रतिष्ठान नेपाल शाखाले ‘सगरमाथा स्रष्टा सम्मान तथा रचना वाचन कार्यक्रम २०८१’ सम्पन्न गरेको छ ।

प्रा.डा. रामप्रसाद ज्ञवालीको प्रमुख आतिथ्य र साहित्यकार कलानिधि दाहालको आतिथ्यमा सम्पन्न सो कार्यक्रममा साहित्य, समाजसेवा र पर्यावरणका क्षेत्रमा योगदान पुर्‍याउने विभिन्न व्यक्तित्वहरूलाई सम्मान गरिएको थियो ।

यसरी सम्मानित हुनेहरूमा हरिभक्त सिग्देल, मानन्धर अभागी, डा. रेणुका सोलु, हेमन्तराज काफ्ले र ज्योति जंगल थिए ।

कार्यक्रमका प्रमुख अतिथि प्राध्यापक ज्ञवालीले लेखेर र बोलेर मात्र साहित्यकार नहुने स्पष्ट गर्दै त्यसका लागि आफूभित्र आत्मविश्वास र लगनशीलता आवश्यक भएको बताए ।

सो अवसरमा संस्थाका अध्यक्ष बुद्धिबल श्रेष्ठ, उपाध्यक्ष भैरवी भूगोल, नेपाल शाखा प्रमुख अमन एकल र केन्द्रीय प्रवक्ता राजेशराज गड्तौलाले संस्थाका गतिविधि र आगामी योजनाका विषयमा आआफ्नो धारणा राखेका थिए ।

कार्यक्रममा कवि तथा साहित्यकार सुमित्रा सुमी, मन्दिरा मधुश्री, टुकादेवी पौडेल आचार्यले आआफ्नो रचना पाठ गरेका थिए ।