काठमाडौं – नेपाली महिला राष्ट्रिय फुटबल टिमकी क्याप्टेन तथा गोलरक्षक एञ्जिला तुम्बापो सुब्बाको जीवनीमा आधारित नेपाली फिल्मको वर्ल्ड प्रिमियर हङकङमा हुने भएको छ ।

निर्माण पक्षले शुक्रबार पोस्टर सार्वजनिक गर्दै मङ्सिर २३ गते प्रिमियर हुने जानकारी दिएको हो । प्रिमियरमा निर्देशक मिलन चाम्स र फिल्ममा अभिनयसमेत गरेकी एञ्जिला सहभागी हुने छिन् ।

फिल्ममा एञ्जिलासहित सुनील थापा, दयाहाङ राई, विजय बराल, सिर्जना सुब्बा, माओत्से गुरुङ, र बुद्धि तामाङलगायतले पनि अभिनय गरेका छन् । नेपालमा यस फिल्मको प्रदर्शन आगामी फागुन २९ गते तोकिएको छ ।

निर्माण पक्षका अनुसार फिल्मको छायाङ्कन एञ्जिलाको जन्मस्थान इलामको आइतबारे पनि गरिएको छ । इलामसहित झापा र काठमाडौंमा पनि छायाङ्कन गरिएको निर्माण पक्षले बताएको छ ।

निर्देशक चाम्सका अनुसार फिल्ममा एञ्जिलाको बाल्यकालदेखि खेल जीवनसम्मको सङ्घर्ष र सफलताको कथालाई चित्रण गरिएको छ ।

खेलाडी बन्न चाहनेलाई यस फिल्मले थप प्रेरित गर्ने उनको दाबी छ । भन्छन्, ‘यस फिल्मले इच्छाशक्ति भए असम्भव केही छैन भन्ने सन्देश दिन खोजेको छ ।’

मुन लभ इन्टरटेन्मेन्टको ब्यानरमा निर्मित यस चलचित्रका निर्माता प्रेम कुमार श्रेष्ठ हुन् । टुबेन्द्र लिम्बू, विनोद अग्रवाल र राजेश बगडिया सह-निर्माता हुन् ।