काठमाडौं – राजनीतिक अभियन्तालाई निशाना बनाउन पाकिस्तान सरकारले प्रतिआतंकवाद कानुनको दुरुपयोग गरेको भन्दै बलोचिस्तान प्रान्तमा सक्रिय संघ संस्थाले आपत्ति जनाएका छन् ।

बलोचिस्तानमा सक्रिय बलोच याकेजेती कमिटिले राजनीतिक अभियन्तालाई निशाना बनाउन सरकारले प्रतिआतंकवाद कानुनको दुरुपयोग गरेको आरोप लगाएको हो ।

केही समयअघि पाकिस्तान सरकारले बलोचिस्तानका अभियन्ताहरु महरंग बलोच र सिबघतुल्लाह शाह जीको नाम प्रतिआतंकवाद निगरानी सूचीमा राखेको थियो ।

विज्ञप्ति जारी गर्दै कमिटिले पाकिस्तानी राज्यले कुनै ठोस प्रमाणबिना बलोचिस्तानका राजनीतिक कार्यकर्तालाई लक्षित गरी प्रतिआतंकवाद कानुनको दुरुपयोग गरेको जनाएको छ ।

कमिटिले पाकिस्तानको यस्तो प्रयास धेरै नटिक्ने समेत चेतावनी दिएको छ । पछिल्लो समय राजनीतिक कार्यकर्तालाई लक्षित गरी पाकिस्तानले प्रतिआतंकवाद कानुनको दुरुपयोग गरेको भन्दै संयुक्त राष्ट्रसंघीय मानव अधिकार उच्चायुक्त र एमनेस्टी इन्टरनेशनलजस्ता संघसंस्थाले पनि चिन्ता व्यक्त गरेका छन् ।