काठमाडौं– युवा तथा खेलकुद मन्त्री जगतबहादुर विश्वकर्माले खेलकुद क्षेत्रलाई अझ उँचो बनाउन र यस क्षेत्रमा देखिएका समस्या सम्बोधन गर्न खेलकुद विकास सम्बन्धमा व्यवस्था गर्न नयाँ विधेयक आएको स्पष्ट पारेका छन् ।

प्रतिनिधिसभा, शिक्षा र स्वास्थ्य समितिकोे आजको बैठकमा विधेयक संशोधनकर्ता सांसदले उठाएका विभिन्न जिज्ञासाको जवाफ दिँदै मन्त्री विश्वकर्माले विधेयकले खेलकुद परिषद्को कार्य सम्पादनलाई अझ प्रभावकारी बनाउने विश्वास व्यक्त गरे ।

उनले भने, उ “खेलकुदको माध्यमबाट समृद्धि हासिल गर्ने सरकारको प्राथमिकता रहेको छ, देशको प्रतिष्ठा उँचो बनाउन खेलकुदको थप अभिवृद्धि गर्नु जरुरी छ ।”

उनले खेलकुदको थप पूर्वाधार विकास गरिने र पर्यटकीय तथा साहसिक खेलकुदको विकास र विस्तार गरिने जानकारी दिँदै खेलकुदलाई राजनीतिक विचारभन्दा माथि उठाउने प्रतिबद्धतासमेत जनाए ।

समितिका सदस्य दिव्यमणि राजभण्डारीले विधेयकमाथि संशोधन प्रस्तुत गर्दै खेलकुद परिषद्को सट्टा खेलकुद प्राधिकरण बनाउन, परिषद्का उपाध्यक्षभन्दा कार्यकारी निर्देशक बनाउन सुझाव दिए ।  उनले भने, “खेलकुद क्षेत्रलाई राजनीतिक आस्था, विचार र प्रभावभन्दा माथि उठाउन जरुरी छ ।”

समितिका अर्का सदस्य विमला विश्वकर्माले विधेयकले समावेशीतामा ध्यान नदिएको चर्चा गर्दै खेल मिलेमतो गर्ने खेलाडिमाथि कारवाहीको दायरा बढाउन माग गरे । प्रस्तावित विधेयकले खेल मिलेमतो गर्ने खेलाडीलाई एक वर्षसम्म कैद र रु एक लाखसम्मको जरिवानाको प्रावधान राखेको छ ।

समितिका सदस्य जीवनराम श्रेष्ठले खेलकुद क्षेत्रलाई अझ विकास र विस्तार गर्न लगानी बढाउन आवश्यक रहेकोमा जोड दिँदै उनले लगानीले मात्र राम्रो नतिजा निकाल्न सकिने धारणा राखे । राष्ट्रियसभाबाट पारित भई आएको सो विधेयकमाथि १५ संशोधन परेको छ ।