काठमाडौं- वि.सं २०७२ मा प्रदर्शनमा आएको फिल्म ‘रेशम फिलिली’को दोस्रो सिक्वेल ‘फेरि रेशम फिलिली’को पहिलो चरणको छायाङ्कन आइतबार सकिएको छ । दशैँ लगत्तै यस फिल्मको छायाङ्कन सुरु भएको थियो ।

निर्माण पक्षका अनुसार काठमाडौं र काभ्रेमा १२ दिन पहिलो चरणको छायाङ्कन भएको हो । दोस्रो चरणको छायाङ्कन भने कात्तिक २२ बाट सुरु हुने बताइएको छ ।

पहिलो सिक्वेलका केन्द्रीय पात्र विनय श्रेष्ठ र कामेश्वर चौरासियाले यसमा निरन्तरता पाएका छन् । नायिका र निर्देशक भने परिवर्तन भएका छन् ।

पहिलो सिक्वेललाई प्रणव जोशीले निर्देशन गरेका थिए भने ‘फेरि रेशम फिलिली’लाई निरोज महर्जनले निर्देशन गरिरहेका छन् । त्यस्तै, नायिका मेनुका प्रधानको स्थानमा सुपुष्षा भट्टको प्रवेश भएको छ ।

फिल्ममा उनीहरुसहित नीर शाह, लक्ष्मी गिरी, प्रकाश घिमिरे, शिशिर वाङ्गदेल, रविन्द्र झा, महेश त्रिपाठी, काजल कर्ण, एवनराज उप्रेती, मेक्सम गौडेल लगायतको अभिनय रहने निर्माण पक्षले जनाएको छ ।

सिनेमा आर्टस्ले वि मोशन पिक्चर्सको सहकार्यमा निर्माण गर्न लागेको यस फिल्मका निर्माता रौनक विक्रम कँडेल हुन् ।