काठमाडौं – शुक्रबार साँझ पक्राउ परेका पूर्व गृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेलाई स्थलमार्गबाट पोखरातर्फ लगिएको छ । लामिछानेकै इच्छा अनुसार प्रहरीले उनलाई गाडीमा नै पोखरा लगेको हो ।

स्थलमार्गबाटै रविलाई पोखरातर्फ लगेकाे प्रहरीले राजमार्गको सुरक्षा अवस्था कडा बनाएको छ । राजमार्गका मुख्य बजारमा सुरक्षाकर्मीको बाक्लो उपस्थिति छ । उनको गिरफ्तारीपछि मुग्लिनमा भेला भई पोखरा हिंडेका भरतपुर र आसपासका समर्थक सवार गाडीलाई प्रहरीले जुगेडीमै रोकेको छ।

सभापति लामिछानेसँग उपसभापति डोलप्रसाद (डिपी( अर्याल , श्रीमती निकिता पौडेल, पार्टीका नेता दीपक बोहरा, पार्टीका सहप्रवक्ता प्रतिमा रावल, कोषाध्यक्ष लिमा अधिकारी गएका छन् । यस्तै निजी गाडीमा अन्य नेताहरू पनि पोखरा प्रस्थान गरेका छन् ।

लामिछानेलाई केन्द्रीय अनुसन्धान ब्यूरो (सिआइबी)को टिमले पार्टी कार्यालयबाट शुक्रबार साँझ पक्राउ गरेको हो ।

पक्राउ अघि रास्वपा कार्यालय अगाडी उपस्थित कार्यकर्तालाई सम्बोधन गर्दै लामिछानेले आफुले कुनै सम्झौता नगरेको कारण पक्राउ गरिएको दाबि गरेका छन् ।

उनले राज्यले आफ्नो सम्पूर्ण शक्ति लगाएर आफुलाई पक्राउ गरेको बताउदै आफ्ना कार्यकर्तालाई राज्यको यो कदमको डटेर सामना गर्न अपिल गरेका थिए ।

उनले आफुले न्यायिक प्रक्रियामा सहयोग गर्ने बताएका थिए । छोटो सम्बोधनपछि लामिछानेलाई प्रहरीले पक्राउ गरेको थियो । पक्राउको क्रममा पार्टी कार्यालय उपस्थित रास्वपाका कार्यकर्ताले नाराबाजी गरेका थिए ।

प्रहरीले लामिछानेलाई आजै सडकको बाटो हुदै पोखरा लैजाने भएको छ ।