काठमाडौं- परराष्ट्रमन्त्री डा. आरजु राणा देउवाले इजरेल र लेबननको लडाकु समूह हिज्बुल्लाहबीचको युद्धका कारण समस्यामा परेका नेपालीको छिटै उद्धार गरिने बताएकी छन् ।

संयुक्त राष्ट्रसङ्घको ७९ औँ महासभा र कतारको दोहामा आयोजित एसिया कोअपरेशन डायलग (एसिडी) को तेस्रो सम्मेलनमा भाग लिएर शुक्रबार स्वदेश फर्किएकी राणाले त्रिभुवन विमानस्थलमा यस्तो बताएकी हुन् ।

विमानस्थलमा आयोजित पत्रकार सम्मेलनमा युद्धका कारण लेबननमा रहेका नेपालीको उद्धारका लागि नाम संकलन भइरहेको जानकारी दिइन् ।

उनले समस्यमा परेका नेपाली सम्पर्कमा आउन नसकेका बताइन्। उनीहरूलाई तत्काल सम्पर्कमा ल्याउन पनि परिवारजनलाई आग्रह गरिन् ।

उनले आफ्नो अमेरिका र कतार भ्रमण सफल भएको पनि बताइन्। त्यसक्रममा एसिडी समूहमा आबद्ध एसियाली राष्ट्रहका प्रतिनिधिहरूसँग फलदायी कुराकानी भएको मन्त्री राणाले बताइन् ।

आपसी हित र चासोका विविध विषय साथै आगामी दिनमा थप सम्बन्ध विस्तार र सहकार्यबारे अन्य राष्ट्रसँग छलफल भएको उनले जानकारी दिइन् ।

एसीडीको बैठकमा एशियाली क्षेत्रमा बढ्दो रुपमा देखिएको युद्धको अवस्था ठूलो चिन्ताको विषय बनेको धारणा राखेको सुनाइन् ।

उनले संयुक्त राष्ट्रसङ्घको महासभामा भाग लिने क्रममा महिला प्रतिनिधित्वबारे पनि आवाज उठाएको जानकारी दिइन् ।