काठमाडौं- फिल्म ‘पूर्णबहादुरको सारङ्गी’मा कलाकारले निर्वाह गरेको चरित्र खुल्ने पोस्टर सार्वजनिक भइरहेको छ । प्रदर्शन मिति नजिकिँदै गर्दा निर्माण पक्षले प्रचारका रुपमा पोस्टरहरु सार्वजनिक गरिरहेको हाे ।

करिब एक महिनाअघि फिल्मका शीर्ष कलाकार विजय बराल र प्रकाश सपुत चरित्र खुल्ने पोस्टर सार्वजनिक गरिएकाे थियाे । सार्वजनिक टिजरमा पनि विजय र प्रकाश मात्रै अटाएका थिए ।

निर्माण पक्षले फिल्मका अर्का शीर्ष कलाकार नायक मुकुन भुसाल भूमिका खुलाएको थिएन । यसैबीच बिहीबार मुकुनको चरित्र खुल्ने पोस्टर सार्वजनिक भएको छ । सो पोस्टरमा फिल्ममा उनी ‘बिरे’को भूमिकाम रहेको पनि खुलाइएको छ ।

पोस्टरमा मुकुनका दुई तस्बिरले स्थान पाएको छ । दुवैमा उनी गाउँले अधवैँशे पुरुषको भूमिकामा देखिएका छन् । पृष्ठभूमिको ठूलो तस्बिरमा उनी सुर्ती माडिरहेको छन् ।

पोस्टरको तल्लो भागमा मुकन गाउँले परिवेशका चार व्यक्तिको बीचमा छन् । सो तस्बिरमा ढाका टोपी, कालो सर्ट र कट्टु लगाएका मुकुनको हातमा हसियाँ छ ।

त्यस्तै, निर्माणले शुक्रबार बुद्धि तामाङको चरित्र खुल्ने पोस्टर पनि सार्वजनिक गरेको छ । पोस्टरबाट उनी ढाक्रे माइला’ भूमिका रहेको जानकारी दिइएको छ । सो पोस्टरको तल्लो भागमा विजय र मुकुनलाई पनि प्रस्तुत गरिएको छ ।

कात्तिक १४ अर्थात लक्ष्मी पूजाबाट पदर्शनमा आउने यस फिल्ममा विजय, प्रकाश, मुकुन, बुद्धिसहित अञ्जना बराइली, माओत्से गुरुङ, देशभक्त खनाल, भोलाराज सापकोटा लगायतको अभिनय छ ।

निर्माण पक्षका अनुसार सोसल ड्रामा जनरामा बनेको यस फिल्म गन्धर्व परिवारको कथामा आधारित छ । यो फिल्मको लेखक र निर्देशक सरोज पौडेल हुन् । पटकथा तथा संवाद भने महेश दवाडीको छ ।

सेभेनसिज सिनेमा र बासुरी फिल्मको प्रस्तुतिमा बनेको यस फिल्मको निर्माता विनोद पौडेल र प्रतीक सुबेदी हुन् ।