काठमाडौं- आर्थिक वर्ष २०८१/८२ को पहिलो महिनामा नेपाल सरकारले ४० अर्ब २१ करोड रुपैयाँ बराबरको खर्च गरेको छ । बिहीबार नेपाल राष्ट्र बैंकले सार्वजनिक गरेको देशको वर्तमान आर्थिक तथा वित्तीय स्थितिको तथ्याङ्कमा उल्लेख गरीएकाे छ ।

सरकारले साउनमा चालु खर्च १२ अर्ब ३८ करोड रुपैयाँ, पुँजीगत खर्च ८ अर्ब ५५ करोड रुपैयाँ र वित्तीय व्यवस्था खर्च १९ अर्ब २७ करोड रुपैयाँ रहेको छ ।

समीक्षा अवधिमा नेपाल सरकारको कुल राजस्व परिचालन (प्रदेश सरकार तथा स्थानीय सरकारमा बाँडफाँट हुने रकमसमेत) ९४ अर्ब ७४ करोड रुपैयाँ पुगेको राष्ट्र बैंकले जनाएको छ । यस अन्तर्गत कर राजस्व ७७ अर्ब ४१ करोड रुपैयाँ र गैर कर राजस्व १७ अर्ब ३३ करोड रुपैयाँ परिचालन भएको केन्द्रीय बैंकले जनाएको छ ।

साउन मसान्तमा राष्ट्र बैंकमा रहेका सरकारका विभिन्न खातामा १९७ अर्ब ८२ करोड रुपैयाँ (प्रदेश सरकार तथा स्थानीय सरकारको खातामा रहेको रकमसमेत) नगद मौज्दात रहेको छ । २०८१ असार मसान्तमा यस्तो मौज्दात ९९ अर्ब २७ करोड रुपैयाँ रहेको राष्ट्र बैंकले जनाएको छ ।