काठमाडौं- सन् २०२५ को ओस्कार अवार्डका लागि फिल्म ‘लापत्ता लेडिज’ले  भारतको प्रतिनिधित्व गर्ने भएको छ ।

फिल्म फेडेरेसन अफ इन्डयाले सोमबार २९ फिल्मको सूचीबाट ‘लापत्ता लेडिज’ ओस्करका लागि पठाउने निर्णय सार्वजनिक गरेको हो ।

किरण रावको निर्देशन रहेको यो फिल्म गत मार्चमा प्रदर्शनमा आएको थियो । भारु ५ करोडको लगानीमा बनेको यो फिल्मले समालोचक र दर्शक सकारात्मक प्रतिक्रिया पाएको थियो ।

फिल्मको ब्यापार भने मध्यम थियो । भारतीय मिडियाहरूकाअनुसार यस फिल्मले घरेलु र विदेशसमा २५ करोड भारु व्यापार गरेको छ ।

सोसल कमेडी ड्रामामा आधारित यस फिल्मले समाजमा महिलाको पहिचानको मुद्दा उठान गरेको छ ।

भारतीय मिडियाका अनुसार ‘एनिमल’, ‘अत्तम’ जस्ता फिल्मलाईपछि पार्दै ‘लापत्ता लेडिज’ ओस्कारका लागि चयन भएको हो ।

यस फिल्ममा नितांशी गोयल, प्रतिभा रत्न, स्पर्श श्रीवास्तव, छाया कदम, रवि किशन लगायतको अभिनय छ ।

‘लापत्ता लेडिज’को निर्माता अमिर खान हुन् । उनी निर्माता रहेको तीन फिल्म ‘लगान’, ‘तारे जमिन पर’ र ‘पिप्ली लाइभ’ यसअघि भारतको प्रतिनिधित्व गरेरे ओस्करमा पठाइएको थियो । उनका तीनै फिल्म ओस्कर अवार्ड जित्न असफल रहे ।

अमिर खानले चौथो पटक पनि अवसर पाएका छन् । तर, यस फिल्ममा भने उनको अभिनय छैन ।अब ‘लापत्ता लेडिज’ को ओस्कारको यात्रा कहाँसम्म पुग्छ ? भारतीय फिल्मप्रेमीका लागि चासोको विषय बनेको छ ।

रवि किशनले भने ‘जीवनको ठूलो क्षण’

फिल्मका अभिनेता रवि किशनले ‘लापत्ता लेडिज’ ओस्कारका लागि चयन भएको खुसी व्यक्त गरेको छन् । उनले यो घटना आफ्नो जीवनको विशेषमध्येको एक भएको बताए ।

उनले भारतीय मिडिया आजतकसँगको अन्तर्वार्तामा भनेका छन्, ‘मेरो लागि यो सपना साकार भएको क्षण हो । यो सबैभन्दा ठूलो सम्मान हो । मैले कहिल्यै सोचेकी थिइनँ । यो मेरो जीवनको सबैभन्दा राम्रो र सबैभन्दा ठूलो खबर हो ।’