काठमाडौं- नायक राजबल्लभ कोइरालाको कमब्याकका रुपमा चर्चा बटुलेको फिल्म ‘एक्टर : टेक वान’को तीन औपचारिक पोस्टर सार्वजनिक भएका छन् ।

निर्माण पक्षले आइतबार फिल्मका तीन शीर्ष कलाकार नायक प्रदीप खड्का, अभिनेतृद्वय आना शर्मा र दिव्या रायमाझी फिचर्ड पोस्टर सार्वजनिक गरेको हो ।

एक पोस्टरमा आना र दिव्याबीचमा प्रदीपलाई राखिएको छ । दुवै नायिकाले प्रदीपको कान तानिरहेको देख्न सकिन्छ ।

अरु दुई पोस्टरमा प्रदीप, आना र दिव्यासँग प्रेम भावमा प्रस्तुत भएका छन् । यसबाट फिल्ममा त्रिकोणात्मक प्रेम सम्बन्धको कथा रहेको अनुमान गर्न सकिन्छ ।

निर्माता थमनकुमार भण्डारीका अनुसार फिल्म प्रचारका लागि यिनै तीन पोस्टर प्रयोग हुनेछ । यी पोस्टर रोलय भिमसेन र उनको टीम ट्राइडेन्ट कन्सेप्टले तयार पारेको हो ।

कात्तिक १५ अर्थात् लक्ष्मी पूजाबाट प्रदर्शनमा आउने यस फिल्ममा प्रदीप, राजबल्लभ, आना, दिव्यासहित दिव्य देव, उषा रजक, सुशील सिटौलालागयतको अभिनय छ ।

अदृत फिल्मस् र मोती फिल्मस्‌को संयुक्त प्रस्तुति रहने यसका निर्देशक राज भुसाल हुन् । स्क्रिप्ट आकाश बराल र निर्देशक भुसालले लेखेका हुन् ।