काठमाडौं- तिहारपछि छायांकन हुने फिल्म ‘कल्ली’ अहिले चर्चामा छ । शीर्ष भूमिकामा रहने भनिएका नायक पल शाहलाई निर्माण पक्षले निकालेपछि यसको चर्चा चुलिएको हो ।

फिल्म ‘रावायण’ प्रदर्शनको दौरान पल शाहको पुरानो विवाद ‘नाबालिका बलात्कार’को विषयले चर्चा पायो । सोही घटनासँग सम्बन्धित विभिन्न तर्कले फिल्मको व्यापार कम भएको भन्ने चर्चा फिल्मीवृतमा छ ।

अहिले पललाई फिल्ममा लिन मेकरहरु हच्किएको अवस्था छ । उनलाई लिन चाहने मेकरहरु अहिले पछि हटेको अवस्था छ । यसको उदाहरण हो– ‘कल्ली’।

कागजी सम्झौता भइसकेपछि पनि निर्माण पक्षले पललाई ‘कल्ली’बाट निकालेको हो । उनको स्थानमा नायक सौगात मल्ल भित्रिएका छन् ।

निर्माण पक्षले शुक्रबार थप तीन कलाकारलाई भित्र्याएको जानकारी दिएको छ । जानकारीअनुसार नायक अपर्ण थापा, कलाकार बुद्धि तामाङ र कमलमणि फिल्ममा भित्रिएका हुन् । उनीहरुले निर्माण पक्षसँग कागजी सम्झौता गरिसकेका छन् । उनीहरुको भूमिकाबारे भने खुलाएइएको छैन ।

रेड बर्ड प्रोडक्सन र कस्तुरी प्रोडक्सनको ब्यानरमा निर्माण हुने ‘कल्ली’का लेखक र निर्देशक लक्ष्मण सुनार हुन् । फिल्मको पटकथा र संवाद महेश दवाडीको रहनेछ ।

निर्माता किरण नेपालीको प्रस्तुति रहेको यो फिल्मको छायांकन तिहारपछि हुने जनाइएको छ । प्रदर्शन मिति भने आगामी चैत २९ गतेलाई तोकिएको छ ।