काठमाडौं- बीएन्डसी अस्पताल तथा मेडिकल कलेजका सञ्चालक दुर्गा प्रसाईंले प्रधानमन्त्री केपी शर्मा ओली र उनका प्रमुख सल्लाहकार विष्णु रिमालको दबाबमा आफूलाई पक्राउ पुर्जी जारी गरिएको बताएका छन् ।

विद्युतीय कसुरको अभियोगमा काठमाडौं जिल्ला अदालतले बुधबार पक्राउ पुर्जी जारी गरेपछि उनले यस्तो बताएका हुन् ।

‘संविधानविरोधी कार्यक्रम होइन, संविधान आफैं जलाइसकेको छ । मलाई छोराछोरीसहित सबै तपाईं जानुस् भनेका छन् म जान तयार छु’, उनले भनेका छन्, ‘सर्लाहीमा भोलि मेरो सर्लाहीमा कार्यक्रम थियो । केपी ओली र विष्णु रिमालको दबाबमा मलाई पक्राउ पुर्जी जारी गरिएको हो ।’

• दुर्गा प्रसाईं र दुईजना युट्युबरविरूद्ध पक्राउ पुर्जी जारी 

उनले आफूलाई छोराछोरी सबैले पुलिस लिन आए जानु भनेको बताए । ‘मलाई छोरीले तपाईंले उठाएको मुद्दा सर्वहारा वर्गको हो भनिन् । तपाईं मरेर जाँदा पनि पछि नहट्नु भनेकी छन् । म हाँसीहाँसी जान तयार छु’, उनले भने, ‘हामीले संविधानविरोधी गतिविधि गरेका छैनौँ । मैले कसैलाई व्यक्तिगत आक्षेप लगाएको छैन । हामीलाई इस्यु बनाएर अर्कालाई मुद्दा हाल्न लगाए । विद्युतीय कारोबारमा मुद्दा हालेका छन् । छोराछोरीले हाँसी हाँसी जानु भनेका छन् ।’

उनले आफू यसबारेमा केपी ओलीसँग कुम जोडेर कुरा गर्न तयार रहेको पनि बताए । ‘नागरिकको मुक्तिका लागि लडेको हो । यो देशका नागरिक जोगाउन लडेको हुँ । अब कस्तो खालको सहयोग गर्छन् नागरिकले हेरौँ’, उनले भने, ‘विद्युतीय अपराधमा मुद्दा हालेछन् । मेरो भोलिको कार्यक्रम मलाई गर्न दिनुस् । म आफैं साइबर ब्यूरोमा जान तयार छु । सर्लाहीको हरिवनमा हुने कार्यक्रम छेक्ने कोसिस भएको थियो । त्यसैलाई रोक्न पक्राउ पुर्जी जारी गरिएको हो ।’

उनले आफूलाई सहयोग गर्ने दुईजना युट्युबरलाई पनि पक्राउ पुर्जी जारी गरिएको बताए । आफ्नो आन्दोलनाई उचाईंमा लैजान योगदान दिएका युट्युबर प्रकाशरचन्द्र दाहाल र जीवन पाण्डेलाई पनि पक्राउ पुर्जी जारी भएको बताए ।

उनले अहिले प्रेस स्वतन्त्रता नरहेको बताउँदै अहिले राणाकालझैँ शासन रहेको पनि बताएका छन् । उनले जतिसुकै दिन भए पनि हिरासतमा बस्न तयार रहेको पनि उल्लेख गरेका छन् ।