काठमाडौं- नेपाली कांग्रेसका महामन्त्री गगनकुमार थापाले सहकारी ठगीबारेमा आफूहरूले यसअघि सार्वजनिक गरेको कुरालाई संसदीय छानबिन विशेष समितिले पुष्टि गरेको दाबी गरेका छन् ।

पार्टी कार्यालय सानेपामा बुधबार आयोजित एक महिने विशेष अभियानको सुरुवात कार्यक्रममा बोल्दै उनले यस्तो बताएका हुन् ।

संसदीय छानबिन समिति गठन माग गर्दा कांग्रेसले गरेको आशंका सांसद सूर्यबहादुर थापा नेतृत्वको समितिले पुष्टि गरेको बताएका हुन् ।

गोर्खा मिडिया प्रालिले सहकारीको रकम अपचलन गरेको, उक्त मिडियाका तत्कालीन सञ्चालक एवम् प्रवबन्ध निर्देशक रवि लामिछाने गृहमन्त्री हुँदा सरकारी निकायले छानबिन नगरेको पनि थापाले बताए ।

गोर्खा मिडियामा सहकारीको रकम अवैधानिक बाटोबाट लैजानेहरूलाई कारबाही गर्न माग गरेर संसदीय छानबिन समिति गठनको माग आफूहरूले राखेको पनि थापाले बताएका छन् ।

संसदीय छानबिन समितिले कांग्रेसले उठाएका सबै विषयलाई सत्यका रुपमा पुष्टि गरिदिएको महामन्त्री थापाले बताए ।

गोर्खा मिडियाले पोखरा, भरतपुर, बुटवल र काठमाडौंका ५ वटा सहकारीबाट करोडौँ रकम गैरकानुनी रूपमा लगेको पनि पुष्टि भएको उनले बताए ।

यो रकम अपचलनमा तत्कालीन सञ्चालक गितेन्द्रबाबु राई (जीबी), कुमार रम्तेल, रवि लामिछाने र छविलाल जोशीलाई प्रचलित कानुनअनुसार कारबाही गर्न सिफारिस गरेको उनले बताए ।

समितिले दोषी किटान गरिरहँदा पनि रास्वपाका-कार्यकर्ताले संसदीय समितिले दोषी किटान नगरेको प्रचार गरिरहेको भन्दै थापाले आश्चर्य लागेको बताए ।

संसदीय समितिमा रहेका रास्वपा सांसद (शिशिर खनाल) ले कारबाही सिफारिस गर्ने निर्णयमा हस्ताक्षर गरेर बाहिर आफ्नो सभापतिलाई दोष लागेन भन्दै भ्रम छरेको थापाले बताए ।

अहिले रास्वपामा सभापति लामिछानेको पापको भारी बोक्ने प्रतिस्पर्धा उक्त पार्टीमा चलिरहेको पनि थापाले बताएका छन् ।

संसदीय समितिको प्रतिवेदन सरकारले कार्यान्वयन गर्नुपर्ने उनको अडान छ । मितेरी सहकारी प्रकरणमा मुछिएका कांग्रेस उपसभापति धनराज गुरुङमाथि पनि आरोप लागेको उनले बताए ।

गुरुङले आफूमाथि छानबिन होस् भनिरहेको बताउँदै थापाले यो विषयमा पनि सरकारले आवश्यक कदम चाल्नु जरुरी रहेको उल्लेख गरे ।