काठमाडौं- चलचित्र ‘पूर्ण बहादुरको सारङ्गी’को ‘काँधेकुरी’ शीर्षकको गीत सार्वजनिक भएको छ । गीतमा प्रशान्त शिवाकोटीको शब्द, संगीत र स्वर रहेको छ ।

गीतको भिडियोमा नायक विजय बराल र प्रकाश सपुतलाई देख्न सकिन्छ । बुवाको भूमिकामा रहेका विजय घरघरमा सारङ्गी रेट्दै पैसा संकलन गरेको देखिन्छ । छोराको भूमिकामा रहेका प्रकाश भने पढ्नका लागि सहर छिर्छन् ।

बाउबाजेको पालादेखिको गन्धर्व पेसा आफ्नो सन्तानले गर्नु नपरोस् भनेर विजयले छोरालाई पढाउनका लागि गरेको संघर्ष गीतमा देख्न सकिन्छ । अर्थात् यो गीतले फिल्मको मुल मर्म गन्धर्व परिवारको भावना व्यक्त गरेको छ ।

यो फिल्ममा विजय र प्रकाशसहित नायक मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल, भोलाराज सापकोटा, विनोद न्यौपानेलगायतको अभिनय छ ।

सरोज पौडेलको कथा र निर्देशन रहने यस फिल्मको पटकथा तथा संवाद महेश दवाडीले लेखेका हुन् । सेभेन सिस सिनेमा र बासुरी फिल्मसको प्रस्तुति रहने यस फिल्मको निर्माता विनोद पौडेल र प्याट्रिक सुवेदी हुन् ।

फिल्मको प्रदर्शन मिति कात्तिक १५ गतेलाई तोकिएको छ ।

हेर्नुहोस् भिडियो :