काठमाडौं- तत्कालीन अवस्थामा नेकपा माओवादी नेतृत्वमा भएको १० वर्ष लामो सशस्त्र संघर्षलाई जनयुद्ध या हिंसा भन्ने विवाद चर्किरहेका बेला राष्ट्रिय सभाको बैठकमा नारा नै लागेको छ ।

गत भदौ १३ गतेको प्रतिनिधि सभा बैठकमा नेकपा एमालेका सचिव एवम् सांसद योगेश भट्टराईले सशस्त्र युद्धलाई हिसा भनेका थिए ।

योगेशको उक्त अभिव्यक्ति संसद्को रेकर्डबाट हटाउन काम गर्दै माओवादी केन्द्रले संसद्‍मा अवरोध गरिरहेको छ ।

आइतबार दिउँसो १ बजेका लागि डाकिएको प्रतिनिधि सभा बैठक उक्त विवादले दिउँसो सवा ३ बजेसम्मलाई सरेको छ ।

विवादबीच राष्ट्रिय सभा बैठकमा माओवादी केन्द्रकी सांसद रेणु चन्दले जनयुद्धलाई अवमूल्यन नगर्न प्रधानमन्त्री केपी शर्मा ओलीलाई चेतावनी दिएकी छन् ।
बैठकमा बोल्दै चन्दले जनताले गरेको क्रान्तिलाई हिंसाको संज्ञा नदिन ओलीसहित एमाले नेताहरूलाई चेतावनी दिइन् ।

‘हुन त गाली दिँदैमा जनयुद्धको महानता कम हुँदैन । गुलाबलाई गोपीको फूल भन्दैमा त्यसको गुण हराउँदैन’, उनले भनिन्, ‘जनयुद्धलाई हिंसात्मक भन्नुस्, तर त्यसको महानता कम हुँदैन ।’

उनले त्यक्रममा महान जनयुद्ध जिन्दावाद भन्दै रोष्ट्रममै उभिएर नारा पनी लगाएकी छन् ।

‘हिंसा कसले गर्‍यो ? जनप्रतिनिधिले टेबल ठटाएर संकटकाल लगाउनु हिंसा गरेको हो कि जनसेवा गरेको हो ?’, उनले भनिन्, ‘आन्दोलनमा लागेका मान्छेको टाउकाको मोल तोक्ने हिंसा हो । जनयुद्ध महान थियो र रहिरहने छ । महान जनयुद्ध जिन्दावाद !’