चलचित्र ‘किस्मत’ बाट अभिनय यात्रा थालेका अभिनेता आर्यन सिग्देलले आफ्नो करिअरको एक दशक पछाडि फर्केर हेर्नुपरेन । उनले कमै फिल्ममा अभिनय गरे तर ती फिल्मले उनलाई सधै चर्चामा राखे । तर पछिल्ला केही वर्षयता भने आर्यनको क्रेज ह्वात्तै घटेको छ । लभरब्यायको छवि बनाएका आर्यनका फ्यान हल धाउन छोडेका छन् ।

आर्यनले अभिनय गरेको पछिल्लो फिल्म ‘हजार जुनीसम्म’ हालै रिलिज भएको थियो । उक्त फिल्ममा उनको शीर्ष भूमिका थियो । तर, उनले फिल्ममार्फत खासै कमाल गर्न सकेनन् । यो फिल्मले न त उनको करिअरलाई फाइदा पुर्‍यायो, न त उनका कारण फिल्म चल्यो । जबकि, आर्यनले यो फिल्मको कथा आफूलाई खुबै मन परेका कारण फिल्म रोजेको बताएका थिए ।

तर, फिल्म नै नचलेपछि उनका अन्य फिल्मलाई पनि असर पर्ने देखिन्छ । भलै आर्यनले एउटा फिल्म नचल्दैमा करिअरलाई असर पर्ने भन्ने नहुने धारणा राख्छन् ।

उनको कमब्याक फिल्मका रुपमा हेरिएको ‘कायरा’ ले पनि हलमा खासै कमाल गर्न सकेको थिएन । ‘हजार जुनीसम्म’ पनि बक्सअफिसमा असफल भएपछि यो फिल्मलाई पनि उनको अघिल्लो फिल्म ‘कायरा’ सँग तुलना गरिएको छ । दुवै फिल्मबाट आर्यनले खुबै आशा गरेका थिए तर दुवै फिल्म असफल रहे । ‘हजार जुनीसम्म’ मा पनि लभर ब्यायका रुपमा देखिएका आर्यनले फिल्मबाट खासै तारिफ पाएनन् ।

अब उनी अभिनित फिल्म ‘च च हुई’ को चर्चा छ । यो फिल्म पनि यसै गरी आउने र हराउने हो कि भन्ने भय छ । फ्यानहरु आर्यनका फिल्म हेर्न हलसम्म आउँदैनन् तर अचम्म त के छ भने सामाजिक सञ्जाल र युट्युबका कमेन्टमा ‘आर्यन सिग्देलका फ्यान एकजुट हौँ’ भन्दै क्याम्पेनिङ भने गर्छन् ।