एजेन्सी– न्यूजिल्याण्डका सभामुख बच्चालाइ बोकेर दूध खुवाउँदै संसदमा पुगेको एउटा भिडियो अन्तर्राष्ट्रिय सञ्चारमाध्यममा छाएको छ ।

इन्धनको मूल्यबारे संसदमा भइरहेको छलफलको अध्यक्षता गर्दै गर्दा उनले बच्चालाई बोकेर दुध चुसाइरहेको देखिएको छ ।

सभामुख ट्रेभर मालार्डले एक सांसदलाई छलफलमा भाग लिन सजिलो होस भनेर शिशु बोकाइदिएका थिए । शिशुका पिता तामती कोफे हुन् । उनले पुरुषसँग विवाह गरेका छन् । सो पुरुष जोडीले सरोगेट आमा प्रयोग गरेर छोरा जन्माएका छन् ।

न्यूजिल्यान्डकी प्रधानमन्त्री पनि हालै एक सन्तानकी आमा बनेकी छिन् । गत सेप्टेम्बरमा जेसिन्डा आर्डन संयुक्त राष्ट्रसंघ गएकी थिइन् । उनका श्रीमान र छोरी पनि सँगै थिए । कार्यस्थललाई बालबालिकामैत्री बनाउने विषय अहिले लोकप्रिय बन्दैछ । अष्ट्रेलियाकी एक सांसदले गत वर्ष यो सन्देशलाइ बल दिएकी थिइन् ।

लरिसा वाटर्सले संसदमा बहस भइरहँदा आफ्नो शिशुलाइ स्तनपान गराएकी थिइन् ।