काठमाडौं – काठमाडौं जिल्ला अदालतले फिल्म निर्माता तथा गोविन्द शाहीलाई थप दुई दिन हिरासतमा राख्न अनुमति दिएको छ । चलचित्र ‘लिलिबिली’ को आम्दानी नदेखाएको भन्दै फिल्मका निर्माता सुदीप खड्काले उनीविरुद्ध प्रहरीमा उजुरी दिएका थिए ।

उजुरीका आधारमा शाहीलाई बुधबार महानगरीय अपराध महाशाखा टेकुले राजधानीको कमलपोखरीबाट पक्राउ गरेको थियो । उनलाई छलफलका लागि पक्राउ गरिए पनि कुरा नमिलेपछि थुनामा राखिएको थियो ।

प्रहरीले उनीमाथि ठगी अन्तर्गत आपराधिक विश्वासघातको मुद्दामा अनुसन्धान भइरहेको महानगरीय प्रहरी परिसर काठमाडौंका प्रवक्ता प्रहरी नायव उपरीक्षक कृष्णकुमार चन्दले जानकारी दिए ।

‘उहाँमाथि म्याद थप गरी अनुसन्धान भइरहेको छ,’ उनले खबरहबसँग भने ।

शाहीले चलचित्र ‘लिलिबिली’ बाट प्राप्त आम्दानी लुकाएको भन्दै निर्देशक मिलन चाम्स र निर्माता सुदीप खड्काले आरोप लगाउँदै आएका थिए । गत वर्ष परेको उजुरीका आधारमा प्रहरीले शाहीलाई पक्राउ गरेको हो ।

प्रहरीकहाँ उजुरी परे पनि निर्माता शाहीले भने उल्टो आफू नै घाटामा गएको भन्दै तर्किँदै आइरहेका थिए । शाहीले उक्त फिल्मबाट उल्टो आफूले पाउनुपर्ने दाबी गर्दै आएका छन् ।

अपराध महाशाखा शाहीमाथि थप अनुसन्धानका लागि शुक्रबार महानगरीय प्रहरी परिसर काठमाडौंको जिम्मा लगाएको थियो ।