काठमाडौं– चक्रपथ सुधार आयोजनाले कलंकी—चक्रपथ—धोवीखोला खण्डको भौतिक संरचना हटाउन गत जेठ २४ गते सार्वजनिक सूचना प्रकाशन गरेको थियो ।

सडकको मध्यभागबाट ३१ मिटरभित्रका भौतिक संरचना १५ दिनभित्र हटाइसक्नुपर्ने भन्दै आयोजनाले सम्बन्धित निकायलाइ पत्राचार पनि गरेको थियो ।यद्यपी सूचना प्रकाशन भएको २ महिना बितिसक्दा पनि संरचना हटाउने काम भने हुन सकेको छैन ।

आयोजनाका योजना प्रमुख अमृतमणि रिमालका अनुसार कलंकीदेखि धोवीखोलासम्म सडक विस्तार गर्नका लागि २ हजार ५७ वटा रुखहरु काटिने भएका छन् ।

२ महिनाअघि नै पत्राचार गरेपनि सम्बन्धित निकायले चासो नदेखाउँदा काममा ढिलाइ भएको उनले बताए । ‘प्रक्रियागत रुपमा जाँदा केही समय लाग्ने भएकाले ढिलाइ भएको हो’ उनले भने ‘केही दिनअघि सडकमार्गभित्र पर्ने सबै रुखमा टाँचा लगाइसकेको छौं ।

रिमालका अनुसार असोज १ गतेबाट रुख काट्न सुरु हुनेछ ।

यो सडकको लम्बाइ ११ दशमलव ६ किलोमिटर रहेको छ । चक्रपथ विस्तारको दोस्रो खण्डअन्र्तगत रहेको यो सडकको डीपीआरको काम धमाधम भइरहेको छ । यो खण्डको सडक विस्तारका लागि चीन सरकारले करिब ६ अर्ब लागत लाग्ने अनुमान रहेको छ भने सडक विस्तार सुरु भएको ४ वर्षभित्र सम्पन्न गर्ने लक्ष्य रहेको छ ।

यसअघि चीन सरकारले नै ११ दशमलव ३९ किलोमिटर लम्बाइको कोटेश्वर कलंकी सडकको विस्तार सम्पन्न गरिसकेको छ ।

कलंकीदेखि धोवीखोलासम्मको सडक विस्तार गर्ने क्रममा १ सय ५० वटा बिजुलीका पोल सारिने रिमालले खबरहबलाइ जानकारी दिए । बिजुलीको पोल सार्ने काम केही दिनमा अघि बढ्नेछ’ रिमालले भने ‘भौतिक संरचना खासै भत्काउनुपर्ने देखिदैँन’ ।