काठमाडौं- फिल्म ‘बलिदान‘को छायाङ्कन सुरु गर्न ‘प्रविधि पूजा‘ गरिएको छ । निर्माण पक्षले शुक्रबार मोरङको सुन्दरहरैंचास्थित पाथीभरा माता मन्दिरमा फिल्म निर्माणमा प्रयोग हुने उपकरणको पूजा गरेको हो ।

निर्देशक सन्तोष सेनका अनुसार शनिबार इटहरीमा चलचित्रको पहिलो शट लिँदै छायाङ्कन सुरु हुनेछ । नायिका ऋचा शर्मा र केही बाल कलाकारको दृश्यबाट छायांकन सुरु हुने उनको भनाइ छ ।

फिल्मका शीर्ष कलाकारहरूको अंशको छायाङ्कन भने केही दिनपछि सुरु हुने उनले जानकारी दिए ।

लामो समयको तयारीपछि फिल्मको छायाङ्कनमा निस्कदा निर्देशक सेन उत्साहित छन् । भन्छन्, ‘बलिदानको निर्माणका लागि लामो समयदेखि हामीले मिहिनेत, खोज अनुसन्धान र प्री-प्रोडक्सनमा गरिएको सम्पूर्ण तपस्यापछि हामी छायांकन चरणमा प्रवेश गरेका छौं।’

• सन्तोष सेन : जब्बर र आँटिला निर्माता, स्वार्थ नै फिल्ममा लगानी

उनका अनुसार फिल्मले नेपाली माटोमाथिको शोषण, निरङ्कुशता, र समाजका नाइकेहरूबाट भएको अत्याचारविरुद्धको कथा उठान गरेको छ । भन्छन्, ‘यस चलचित्रलाई महाकथा का रूपमा चित्रण गर्ने मेरो लक्ष्य छ । यो प्रोजेक्टका लागि जस्तोसुकै त्याग र बलिदान गर्न तयार छु ।’

‘बलिदान’मा दक्षिण भारतका चर्चित प्राविधिकहरू, द्वन्द्व निर्देशक स्टन्डर साम र छायाकार शरण ऋषि लगायत ५० जनाको प्राविधिक टोली छ। छायाङ्कनमा प्रयोग गरिने लाइट, साउन्ड, र क्यामेरालगायतका उपकरणहरू पनि मुम्बईबाट ल्याइएको हो।

सेनका अनुसार यो फिल्मको ६० प्रतिशत छायांकन स्टुडियोमा हुनेछ । यसका लागि इटहरीस्थित बीएमसी स्टुडियोमा र अन्य स्थानमा पनि सेट निर्माण गरिएको छ।

फिल्मको नायक विराज भट्टका छोरा समीर हुन् । समीरसहित फिल्ममा सौगात मल्ल, अर्पण थापा, दिव्य देव र ऋचा शर्माको पनि मुख्य भूमिका रहनेछ।

आसुसेन फिल्मस् प्रा.लि. र सन्तोष सेनको प्रस्तुति रहेको फिल्म ‘बलिदान’का निर्माता पवन ब्राडफोर्ड बिस्ट र सह-निर्माता प्रेम पुरी हुन्।