काठमाडौं– कान्ति बाल अस्पताल भित्र पानी चुहिने सिलिङको एक महिनापछि मर्मत भएको छ । अस्पतालको मेडिकल वार्डतर्फ जाने बाटोमा एकमहिना अघिदेखि पानी चुहिन्थ्यो ।
अस्पतालको प्रयोगजनका लागि जडान गरिएको पानीको पाइप सिलिङ भित्रै फुटेर पानी चुहिने भएपनि अस्पतालले एक महिनासम्म मर्मत गरेको थिएन ।
एकमहिनासम्म मेडिकल वार्डमा जाने बाटोमा पानी चुहिदा पनि अस्पतालले नबनाएपछि खबरहबले सो विषयमा समाचार प्रकाशित गरेको थियो । समाचार प्रकाशित भएपछि कान्ति अस्पतालले पानी चुहिएको ठाउँ ३ दिनभित्रै मर्मत गरेको छ ।
‘ढलानभित्रै पानीको पाइप फुटेर पानी चुहिएको थियो,’ अस्पतालका निर्देशक आरपी विच्छाले भने, ‘तीन दिनलगाएर छतबाट ढलान नै फुटाएर पाइन मर्मत गरी चर्किएको भाग पनि बनाइसकेका छौं । अब बिरामीलाई त्यहा जोखिम छैन ।’
यसअघि एक महिनासम्म मेडिकल वार्डतर्फ जाने बाटोमा पानी चुहिदा मेडिकल वार्डमा आवतजावत गर्ने बिरामी बालबालिका, बिरामी कुरुवा र चिकित्सकहरु समस्यामा परेका थिए । एक महिनासम्म सिलिङबाट पानी चुहिदा भवनको सिलिङ नै चर्किएको थियो ।
यो पनि पढ्नुस्
प्रतिक्रिया