काठमाडौं – इंग्लिस प्रिमियर लिगमा चेल्सीले पहिलो जित दर्ता गरेकाे छ । आइतबार राति सम्पन्न खेलमा नोनी माडुएकेको ह्याट्रिकको मद्दतमा चेल्सीले वुल्भ्सविरुद्ध ६–२ को सानदार जित निकालेको हो ।

वुल्भ्सको घरेलु मैदानमा भएको खेलमा चेल्सीका लागि नोनीले ह्याट्रिक गरे । त्यस्तै कोल पाल्मर, निकोलस ज्याक्सन र जोआओ फेलिक्सले एकएक गोल गरे । वुल्भ्सका लागि म्याथ्युअस कुन्हा र जोर्गेन स्ट्रान्ड लार्सनले एकएक गोल गरे ।

पहिलो हाफ २–२ को बराबरीमा सकिए पनि वुल्भ्यस दोस्रो हाफमा सम्हालिन नसक्दा चार गोल खायो । दोस्रो मिनेटमै ज्याक्सनले गोल गर्दै चेल्सीलाई अग्रता दिलाएका थिए । २७ औं मिनेटमा वुल्भ्सका लागि कुन्हाले बराबरी गोल फर्काएका थिए ।

पहिलो हाफको अन्त्य तिर पाल्मरले गोल गर्दै चेल्सीलाई २–१ को अग्रता दिलाए । पहिलो हाफकाे इन्जुरी समयमा वुल्भ्सका लागि लार्सन बराबरी गोल फर्काए ।

४९औं मिनेटमा पहिलो गोल गरेका नोनीले ५८औं र ६३औं मिनेटमा गोल गर्दै ह्याट्रिक पूरा गरे । ८०औं मिनेटमा फेलिक्सले चेल्सीका लागि छठौं गोल गरेका थिए ।

जितसँगै दुई खेलबाट तीन अंक जोडेको चेल्सी ८ औं स्थानमा उक्लिएको छ । दुई खेलमा नै पराजित भएको वुल्भ्स अंकविहीन रहँदै पुछारबाट दोस्रो स्थानमा छ।