काठमाडौं – एएफसी वुमेन्स च्याम्पियन्स लिगको प्रारम्भिक चरणको पहिलो खेलमा नेपालको एपीएफ क्लब पराजित भएके छ । आइतबार साँझ भएको खेलमा एपीएफ उज्वेकिस्तानको पिएफसी नसाफसँग १–० ले पराजित भएको हो ।

मलेसियाको लिक्सा स्टेडियममा भएको खेलमा पिएफसी नसाफले ४९ औं मिनेटमा अग्रता लिएको थियो । उसका लागि लिलीले गोल गरिन् ।

पहिलो हाफमा बराबरीमा सकिएपनि एपिएफ दोस्रो हाफको सुरुवातमा नै चुक्यो । एपिएफले बुधवार अन्तिम खेलमा मलेसियाको सबाह एफसीसँग खेल्नेछ । एपिएफ नेपालको महिला लिग च्याम्पियनको हैसियतमा प्रतियोगिताका लागि छनोट भएको हो ।

एसियन फुटबल कन्फेडेरेसन (एएफसी)ले पहिलो पटक वुमेन्स च्याम्पियन्स लिगको आयोजना गरेको हो । लिगमा २२ सदस्य राष्ट्रका क्लबहरुको सहभागिता रहनेछ ।

सन् २०२४ को फिफा वरियताको शीर्ष ८ मा रहेका राष्ट्रका क्लबहरुले सिधै समुह चरणमा स्थान बनाएका छन्। अन्य १४ क्लबले भने प्रारम्भिक चरण पार गर्नुपर्ने हुन्छ।