काठमाडौं– चीनका लागि जासुसी गरेको आरोपमा अमेरिकामा चिनियाँ मूलका एक जनालाई २५ वर्षको जेल सजाय सुनाइएको छ ।

चीनका लागि जासुसी गरेको आरोपमा चिनियाँ मूलका अमेरिकी नागरिक शुजुन वाङलाई न्यूयोर्कको अदालतले २५ वर्षको जेल सजाय सुनाएको हो ।

उनले अमेरिकामा बसोबास गरिरहेका चिनियाँहरुको गोप्य सूचना चीनको जासुसी निकायलाई प्रदान गर्दै आएको भारतीय समाचार संस्था एएनआईले जनाएको छ । ७५ वर्षीय वाङले न्यूयोर्कको क्विन्समा चिनियाँ सत्ताविरोधी संस्था स्थापना गर्न पहल गरेका थिए ।

उनले लोकतन्त्रवादी अभियन्ताको भेषमा न्यूयोर्कमा सक्रिय अभियान समूहहरुबाट संवेदनशील सूचना लिने र चिनियाँ जासुसी निकाय एमएसएसलाई प्रदान गर्दै आएको जनाइएको छ । उनले सन् २००६ देखि चीनको राष्ट्रिय सुरक्षाको निर्देशनमा काम गरिरहेको जनाइएको छ ।