काठमाडौं– स्पेनिस ला लिगा फुटबलमा बार्सिलोनाले विजयी सुरुवात गरेको छ । गएराति भएको खेलमा भ्यालेन्सियालाई २–१ गोलले हराउँदै बार्सिलोनाले सुखद सुरुवात गरेको हो ।

बार्सिलोनाका लागि रोबर्ट लेवान्डोस्कीले दुई गोल गरे । भ्यालेन्सियाका ह्युगो डुरोले एक गोल गरेका थिए ।

खेलको ४४औँ मिनेटमा भ्यालेन्सियाका डुरोले सुरुवाती गोल गरेका थिए । तर पहिलो हाफको इन्जुरी समयमा बार्सिलोनाका लेवान्डोस्कीले गोल गर्दै खेललाई १–१ गोलको बराबरीमा ल्याए ।

त्यसपछि दोस्रो हाफको ४९औँ मिनेटमा लेवान्डोस्कीले व्यक्तिगत दोस्रो गोल गर्दै बार्सिलोनालाई २–१ गोलको जित दिलाए । सुरुवाती अग्रता जोगाउन नसक्दा भ्यालेन्सिया पराजित हुन पुग्यो ।

यो जितसँगै बार्सिलोनाले पहिलो खेलमै ३ अंक जोडेको छ । भ्यालेन्सियाले हारबाट लिगको सुरुवात गरेको छ ।