काठमाडौं – काठमाडौंमा जारी एसियन भलिबल कन्फेडेरेसन (एभिसी) सेन्ट्रल जोन भलिबल च्याम्पियनसिपमा आज (शुक्रबार) नेपाल पाँचै स्थानका लागि अफगानिस्तानसँग भिड्दैछ । त्रिभुवन आर्मी क्लबको लगनखेलस्थित कभर्डहलमा नेपालले अफगानिस्तानसँग दिउँसो ३ बजे प्रतिस्पर्धा गर्नेछ ।

समूह बि मा रहेको नेपाल समूह चरणका दुवै खेलमा पराजित भएपछि सेमिफाइनल पुग्नबाट बञ्चित भएको थियो । तर, समूह चरणबाट बाहिरिएका दुवै टोली अफगानिस्तान र नेपाल पाँचौं स्थानका लागि संघर्ष गर्नेछ ।

यसअघि साउन अन्तिममा भएको अफगानिस्तानसँगको मैत्रिपूर्ण खेलमा नेपालले अफगानि टोलीलाई पराजित गरेको थियो । दुई खेलको मैत्रिपूर्ण खेलमा नेपालले दुवै खेल जीतेको थियो भने प्रतियोगिताका दुवै खेलमा हार व्यहोरेको अफगानस्तानलाई पराजित गर्दै प्रतियोगितामा जीत विहीनहुनबाट जोगिनेछ ।

घरमै भएको प्रतियोगितामा नेपाली टोली एभिसीको सेमिफाइनल पुग्नबाट चुक्यो । एभिसी इतिहासमा नेपाल पहिलो पटक समूह चरणबाट शीर्ष चारमा पुग्न सकेन ।