काठमाडौं- प्रधानमन्त्री केपी शर्मा ओली नेपाली सेनाद्वारा निर्माणाधीन काठमाडौं–निजगढ फास्ट ट्रयाक अनुगमनका क्रममा सुरुङमार्गको पनि यात्रा गर्ने भएका छन् ।

प्राविधिकहरूको टोली लिएर अर्थमन्त्रीसहित ओली सोमबार बिहान काठमाडौंबाट फास्ट ट्रयाकको लेनडाँडा बेस क्याम्पमा अवतरणपछि अनुगमनमा निस्किएका हुन् ।

अनुगमनका क्रममा उनले नेपाली सेनाले बनाएका सुरुङमार्गको पनि यात्रा गर्दैछन् । उपप्रधान तथा अर्थमन्त्री विष्णु पौडेल र मुख्य सल्लाहकार बिष्णु रिमालसहित गएका ओलीले केही सुरुङमार्गको यात्रा गर्न लागेका हुन् ।

सचिवालयका अनुसार ओली सुरुमा गाडीबाट लेनडाँडा सुरुङको निकासतर्फ गएर आउनेछन् ।

फास्ट ट्रयाकको निर्माण अहिले नेपाली सेनाले गरिरहेको छ । सेनाले त्यहाँ नेपालमै पहिलो पटक धरहराभन्दा अग्ला पुल र केही किलोमिटर लामा सुरुङमार्ग पनि बनाइरहेको छ ।

अनुगमनका क्रममा ओलीले निगगढ-काठमाडौंतर्फको लेनडाँडा सुरुङमार्ग हुँदै प्रवेश इलाकातर्फ गएर फर्किने तालिका छन् । त्यसैगरी लेनडाँडा इलाकामा निर्माणाधीन सुरुङ, जितपुर खोला पुल तथा धोद्रे सुरुङको निकास क्षेत्रको पनि ओलीले निरीक्षण गर्दैछन् ।

त्यसैगरी निजगढ-काठमाडौंको धोद्रे सुरूङ मार्ग हुँदै प्रवेश इलाकातर्फ गएर फर्किने तालिकाअनुसार अहिले ओली अनुगमनमा छन् ।

त्यसैगरी काठमाडौं-निजगढतर्फको धेद्रे सुरुङमार्गको ब्रेक थ्रू पनि ओलीको उपस्थितिमा हुँदैछ ।

त्यसपछि ओलीले धेद्रे इलाकामा निर्माणाधीन पुल तथा द्रूतमार्गका संरचना र ब्रेक थ्रु भएको धेद्रे सुरुङमार्गको पनि निरीक्षण गर्दैछन् ।

उनी त्यसपछि निजगढ-काठमाडौंतर्पको धेद्रे सुरुङमार्ग तथा काठमाडौं-निजगढतर्फको लेनडाँडा सुरूङमार्ग हुँदै बेसक्याम्प आएर काठमाडौं फर्किने तालिका छ ।