काठमाडौं – पाकिस्तानको सिन्ध प्रान्तमा महिला हिंसाका घटनामा वृद्धि भएको छ । सन् २०२४ को पहिलो ६ महिनामा सिन्ध प्रान्तमा ८ सय ३७ वटा महिला हिंसाका घटना भएको पाकिस्तानको एक्सप्रेस ट्रिब्युनले जनाएको छ ।

त्यहाँको हरी वेलफेयर एशोसिएसनले सिन्धी र ऊर्दू अखबारमा आएका समाचारलाई आधार बनाएर यो तथ्यांक सार्वजनिक गरेको हो । ८ सय ३७ घटनामध्ये १ सय ७४ घटना आत्महत्यासँग सम्बन्धित रहेको एक्सप्रेस ट्रिब्युनले जनाएको छ । त्यसबाहेक १ सय ४० वटा अपहरण, १ सय २५ वटा बलात्कार, १ सय १८ हत्याका घटना भएका छन् ।

त्यस्तै, ६८ वटा घरेलु हिंसाका घटना भएका छन् भने १३ वटा जबरजस्ती विवाहका घटना भएको जनाइएको छ । सिन्धका ३० मध्ये सबैभन्दा धेरै घटना खैरपुरमा भएको छ । जहाँ ७७ वटा महिला हिंसाका घटना भएको तथ्यांकमा उल्लेख छ ।